حكاوى وبلاوى

الحلقة الاولى أبو جهل 2009

صباح الفل يا إبليس بيه
- صباح الخير يا بني .. اطلع بينا على سنة 622
- ياااااااااه .. سعادتك إيه اللي هيوديك هناك .. دي الدنيا كات صعبة أوي أيامها
- وحشوني والله يا عكروت .. أعمل ايه بقى .. نفسي أشوف أبوجهل
- ما تشوفش وحش يابيه .. وصلنا خلاص
ينزل إبليس من العربية .. ويخبط الجرس على بيت أبو جهل .. تفتح له الشغالة
- الأستاذ أبو جهل موجود
- أيوه موجود .. مين حضرتك ؟
- قولي له إبليس
- دقيقة واحدة يخرج أبو جهل
- أهلاااااااااااااان .. إزيك يابو مُـرّة .. واحشني يا راجل .. إيه الغيبة الطويلة دي .. اتفضل اتفضل
- والله هفيت على بالي اليومين اللي فاتوا .. والعالم بتوع القرن الواحد وعشرين خنقوني .. قلت آجي أشرب معاك كاسين .. حجرين .. الموجود بقى .. أي حاجة
- على حسابي وللا على حسابك ؟
- أيوووه عليك .. انت لسه .... زي مانت .. يا راجل ده انا بقالي 200 سنة ما شفتكش .. ده اللي انا علمتهولك ؟
- آه .. ههههههههه .. طب اقعد بس اقعد .. ده الحالة بقت كرب أوي .. ونفسي أفضفض لك شوية
- خير يا بوجهل
- لا والله مافيش .. فاكر انت آخر مرة كنت معانا لما اتفقنا نطلع من رجل قبيلة .. ونقتل محمد
- آه .. كانت فكرة مالهاش حل
- بس الخطة فشلت .. وقدر يهاجر يثرب ومن بعدها ما شفناش يوم حلو .. والعملية نشفت أوي وبدأوا يقفلوا علينا طرق التجارة .. العيشة بقت صعبة أوي يا إبليس يا خويا
- بس بس قطعت قلبي .. طيب أنا جاي لك في مشوار حلو .. هيفتح نفسك
- مشوار ايه يا معلم .. قوللي
- شوف يا سيدي .. أنا جاي لك دلوقت من القون الواحد وعشرين .. فيه شغلانة جامدة أوي في مصر ظبطتها تظبيطة ما حصلتش .. وأنا حاسس بيك قلت آخي آخدك تتفرج .. أرفع روحك المعدنية شوية
- بس ما يكونش التظبيط الخايب بتاعك زي شغلانة من كل رجل قبيلة دي
- كده برضه .. الله يسامحك .. بس اطمن المرة دي .. هتيجي جون يعني هتيجي جون
- والمشوار ده هنروحه ازاي
- اركب بس اركب .. ما تخافش مش هأخرك
ركب أبو جهل العربية مع إبليس .. ووصلوا القاهرة .. أبو جهل تـَنـّح
- إيه ده يا إبليس يا خويا .. احنا لسه في الدنيا ؟؟
- هههههه .. جمد قلبك ياراجل .. احنا بعد 1400 سنة من أيامكم
- وايه الناس دي .. عاملين في نفسهم كده ليه
- إيه مش عاجبينك ؟
- يعني .. الستات لابسين عريان قوي .. والرجالة شكلهم شبه الستات .. وبص الواد ده ماشي مع البنت ازاي .. بيحضنها في الشارع كده .. اخص عالرجالة
- ههههههه .. ياراجل ماتقولش كده .. دول على فكرة مسلمين
- إيه ؟؟ .. هو دين محمد وصل لغاية هنا
- آه طبعا .. من زمان أوي .. بص الجوامع أد إيه .. واللي انت سامعه ده اسمه الأذان .. بينادوا عالناس وقت الصلاة عشان يصلوا
- الله ؟؟ .. أمال مالهم قاعدين كده ما بيتحركوش .. وعشرة عشرين واحد بس اللي داخلين الجامع
- آه .. أصل النهارده فيه ماتش .. واللي قاعدين دول بيتفرجوا عالماتش في القهوة
- ماتش ؟؟ .. إيه ده ؟؟
- دي فكرة حلوة من أفكار أخوك .. الناس بتحب الرياضة .. فيها حاجة دي ؟
- لأ مافيهاش
- أنا قعدت بقى أكبرها وانفخ فيها لحد مالناس بقت تحبها أكتر من الصلاة
- يابن الإيييييييه ؟؟ .. ده انت هتروح جهنم
- فال الله ولا فالك .. فقري طول عمرك
- بس ايه اللي مكتوب عالحيطان ده ؟؟ .. الإسلام هو الحل ؟؟ حل إيه ؟؟
- ما هو ده اللي انا جايبك عشانه
- طب نورني .. ايه الموضوع
- شوف يا سيدي .. بعد الأيام بتاعتكم المسلمين وصلوا للدنيا كلها وحكموا البلاد دي بالقرآن اللي جابه محمد
- أيوووووووه .. حكموا البلاد دي
- آه امال ايه .. بس اخوك ما سكتش
- أيوه طمني كده .. عملت ايه بقى ؟؟
-فضلت ورا ناس منهم .. لغاية ما طلعت في دماغهم إن القرآن ده كان بتاع زمان بس .. وما ينفعش الزمان ده
- معقول ؟؟ وصدقوك ؟؟
- طبعا .. ومن يومها بطلوا يحكموا بالقرآن .. وفضلوا يحاربوا الناس اللي عايزة تحكم بالقرآن .. ويقولوا عليهم أسامي تضحك أنا اللي علمتها لهم .. رجعيين .. متخلفين .. متطرفين .. إرهابيين .. حوارات كده
- الله ينور عليك .. أهو كده الشغل الصح .. طب ليه بقى رجعوا يكتبوا الإسلام هو الحل عالحيطان
- أصل مع الوقت الناس اللي انا ربيتهم دول بقوا حرامية كبار أوي .. وسرقوا كل حاجة في البلد .. لحد ما ناس بقت مش لاقية تاكل .. (يسمعوا صوت واحد بيصرخ .. الحقونيييييي .. هيموتونيييييييي)
أبو جهل - ايه ده ؟؟ .. تعال نخلص الراجل ده بسرعة ده بيستنجد بينا .. أنا جاااااااااااي
إبليس - بس بس رايح فين .. انت اتجننت وللا إيه ؟
- اتجننت ؟؟ .. انت مش سامع الراجل بيستنجد بينا .. دول بيسرقوه وهيموتوه .. ده واحد رافع عليه سيف
- لا ما تقلقش .. ده عادي دلوقت دول عايزين يسرقوا حاجه منه اسمها الموبايل وده حاجه حكايتها حكايه هبقى اقلك عليها بعدين
- إيه اللي عادي .. ما حدش ينجده ؟؟
- آه .. ما هو أنا خليت الناس دلوقت تنسى حوارات النجدة والمروءة .. والوهم بتاعكوا بتاع زمان ده .. دلوقت لو واحد قعد ينادي على الدنيا كلها الناس ولا هاتعبره
- اخص على الناس .. ده انت بوظت الناس خالص يا جدع.
- أمال كنت فاكرني بالعب الكام ألف سنة اللي فاتوا دول .. شغل يابا
- وبعدين
- رجع الناس يفكروا تاني يحكموا بالقرآن .. وناس كتير طلعت تقول ان الإسلام هو الحل .. بس أنا كنت مظبط بقى شوية ناس يطلعوا في الفضائيات والجرايد فترة طويلة .. الناس وثقت فيهم وبقوا يصدقوهم .. وخليتهم يقولوا إن الإسلام ما ينفعش حل .. وخلينا نجرب فكر جديد وكلام من ده .. وادونا فرصة تانية
- يعني معقول فيه ناس لسه بتفكر يحكموا تاني بالإسلام .. زعلتني يا شيخ
- ما تقلقش .. أخوك شغال .. هم في الآخر اتفقوا يخلوا الناس هي اللي تحكم بينهم .. اللي تختاره الناس يمشي .. عشان كده كل فريق منهم بيعمل إعلانات لفكرته .. ومنها اللي مكتوب عالحيطان ده .. وبيسموا الشغلانة دي انتخابات
- طيب وانت ايه اللي مخليك مطمن أوي ان أغلب الناس مش هتختار الإسلام هو الحل
- لا طبعا .. هو الموضوع مش كده .. تعالى بس اوريك .. انا معزوم النهارده مع اصحابي على قعدة كده عشان نظبط موضوع الانتخابات ده
- وإيه الزحمة دي .. الناس دي كلها بتعمل ايه ؟
- ده واحد نازل الانتخابات وجايب الناس في الشادر ده عشان يقول لهم هيعمل ايه
- ده من بتوع الإسلام هو الحل وللا من اصحابك ؟
- لا ده ولا ده .. أصل فيه ناس تانية كتير مش عاجبها اللي عملناه في البلد .. وبيقولوا لازم نصلح البلد ومش شرط نقول الإسلام هو الحل لإن كل الناس مسلمين .. بس بيني وبينك اصحابي خايفيم منهم أوي عشان ناس نضيفة مش حرامية زيهم .. ياللا وصلنا اهوه ( يدخلوا فيللا فخمة .. يدخل ابليس ومعاه أبو جهل .. الناس بتبص لابو جهل ومستغربين من شكله .. مزمزة هانم تستقبلهم )
- أهلا أهلا إبليس بيه .. إيه اللي معاك ده ؟؟ .. لقيته فين ده ؟
- أهلا مزموزتي .. لا ده صاحبي عمرو .. بس هو كان رايح حفلة تنكرية وجبته على هنا وما لحقش يغير
- آآآآآآآآآآه .. تصدق ده انت فعلا شبه عبد الكعبة اللي كان في فيلم امبارح ..
- آه .. ماهو يبقى ابن اختي
- ابن اختك ؟؟ ههههههههه .. دمك خفيف أوي يا سي عمرو
- لمـّي إيدك يا ولية انتي .. .. انتي من أصحاب الرايات الحُمر وللا إيه ؟
- رايات ايه يا دلعدي .. حُمر ؟
ابليس – لا لا ما تاخديش على كلامه .. ده أصله شيوعي ..
– عسل يا إبليس بيه .. عسل .. طول عمرك دمك زي العسل
ابليس – طب خلينا في موضوعنا .. الشلة وصلت وللا لأ .. كانوا قايلين لي عايزينـّي النهارده
- كلهم جوه .. مستنيينك من بدري ( يدخل ابليس وأبو جهل .. الناس يشوفوا دقنه وشكله يتخضوا .. ويلموا الورق اللي في إيديهم )
إبليس – ما تخافوش .. إيه ؟؟ .. ده عمرو صاحبي .. أمان يعني .. هو أنا يعني غشيم أجيب لكم حد كده وللا كده
- لا مؤاخذة يا بيسو .. احنا شفنا دقنه قلنا إرهابي وواخدك رهينة وللا حاجة
- يا عبيط .. انتوا هتكدبوا الكدبة وتصدقوها .. مانتو عارفين ان ما حدش بيعمل كده .. المهم .. وروني عملتوا إيه .. إيه الجديد السنة دي
واحد - كتير .. البركة فيك يا ريس
التاني – شوف يا سيدي .. أنا اتفقت مع مقاولين أصوات ندفع للناس فلوس .. ويدونا صوتهم .. هنغريهم بمبالغ كبيرة أوي .. وموبيلات .. وأكل
إبليس – طب ولما ياخد الفلوس ويديهم صوته يا حدق .. هتعمل فيها ايه دي ؟
التالت – عييييييب .. معانا أهو ورق تصويت فاضي .. هادي له اللي متعلم عليها باسمي ويديني الفاضية اللي هياخدها من جوه
إبليس – معقول برضه .. مش بطال .. غيره
الرابع – شوف يا سيدي .. عملنا كشوفات بالناس اللي في شركاتنا وكل واحد طلع لهم ولعيلتهم آلاف البطايق في دايرته
إبليس – قديمة .. ما هو الناس اللي قصادنا كتير برضه وممكن عددهم يبقى أكتر مننا
الرابع – هههههههه .. ما هو احنا بوظنا الكشوفات اللي فيها الأسماء .. ما حدش هيعرف مكانه الجديد .. أي واحد يروح يدي صوته هيحتاس ونلففه على ميت لجنة لحد ما يزهق ويروح
إبليس – براوة عليك يا وله .. أهو كده الشغل وللا بلاش .. إيه رأيك يا عمروأبو جهل
– لا والله ما هذا بالرأي .. الناس لو مخنوقة منكم فعلا هيفضلوا يدوروا لغاية ما يعرفوا لجانهم
التاني – أمال انت رأيك فيه يا فتك ؟
أبو جهل – ليس لهم إلا السيف .. ادبحوهم .. اسألوني انا
إبليس – اتنيل اسكت انت .. الكلام ده ما عادش ينفع .. ما تشوفوا لنا حاجة تانية يا جماعة .. فين أيام زمان لما كنا بنغير الصناديق
الخامس – ما هو الجماعة اللي جوه اللجنة دلوقت مش تبعنا .. وما نقدرش عليهم ياريس .. وممشيينها ميري أوي
إبليس – طيب .. على أي حال خلينا نشوف .. بيتهيألي احنا نجحنا فعلا نقنع الناس ان فيه تغيير وفكر جديد .. وطلعنا بطاقات كتير .. وشوية بالفلوس .. وما فيش حد أصلا هيروح يدي صوته .. نتوكل على الله .. وربنا يسهل
&&&&&&&&&&&&&&

الحلقة الثانية ((أبوجهل))
انتهى الاجتماع بين إبليس وشلته .. وخلاص ماشيين

مزمزة هانم في وداع أبوجهل وإبليس .. أبو جهل يسأل إبليس



- على فين المرة دي



- تعال معايا .. هاسهرك سهرة عمرك ما سهرت زيها



- بس الوقت متأخر أوي .. الساعة عشرة بالليل



مزمزة – متأخر ؟؟ .. هههههه .. والله صاحبك ده تحفة أوي يا إبليس بيه .. هو احنا لسه سهرنا ؟؟ .. ده الناس يا دوبها بتصحى من النوم



إبليس – تعال بقى ما تفضحناش .. مش عايز تشرب لك كاسين ؟؟



أبو جهل – آه والله .. في عرضك .. ده انا دماغي خلاص هتضرب



مزمزة – هتروحوا على فين المرة دي ؟



ابليس – هنروح كاباريه (زأططة) .. خليه يشوف له يومين



مزمزة – زأططة حتة واحدة ؟؟ ده انت جامد أوي .. بس خللي بالك على صاحبك .. أحسن ده لقطة وممكن هناك يضحكوا عليه للصبح



إبليس – لا .. ده بيتهيألك بس .. سلام



مزمزة – سلام



ينزلوا في الشارع



عسكري المرور – مخالفة يا بيه خمسين جنيه عشان راكن صف تاني



إبليس – معلش بقى فوتها المرة دي



أبو جهل – إيه الموضوع ؟



إبليس – فيه قانون بيفرض غرامة على اللي يسيب العربية زينا كده



أبو جهل – طب وهتعمل إيه ؟؟



إبليس – ولا حاجة .. هاديله نصهم عشان يسيبنا نمشي



أبو جهل – بس دي رشوة .. أكيد مش هيرضى



إبليس – اسكت انت بس .. خليك في حالك .. خد يا حصـّول .. عشرة جنيه اهي .. عشان تشرب شاي



العسكري – إيه ده يا بيه .. لا .. خليها مش عايزها



أبو جهل – شفت ؟؟ .. مش قلت لك .. مش معقول هياخد رشوة



إبليس ( يبتسم للعسكري ) – ههههه .. طب خلاص .. عشرين اهم .. خلاص بقى يا دفعة



العسكري – تشكر يا بيه .. ما نتحرمش



أبو جهل – إخص على كده .. ياخد رشوة ؟؟



العسكري يبص لابو جهل – بتقول حاجة يا مولانا ؟؟



أبوجهل – باقول ان دي رشوة



العسكري – ياعم الحاج دي إكرامية .. وبعدين ما تقول الكلام ده للحرامية الكبار اللي مجوعينا ومنشفين دمنا .. يعني جت عليا انا ؟؟



إبليس (لأبو جهل) – ياعم انت ما تحبكهاش كده .. أنا مظبط الناس أوي .. تلميذك يا عموووور



أبو جهل – ألا هو احنا لازم نروح البتاع اللي بتقول عليه ده .. ما ينفعش نشرب في أي محل من دول ونروح .. أنا تعبان أوي



- لا .. ما ينفعش .. أصل المسلمين بيحرموا الخمرة .. ولو شافونا سكرانين ممكن يضربونا



- يضربوا مين يا جدع .. خللي حد منهم يقرب مني وأنا أوريك هاعمل فيه إيه- ياعم مش عايزين مشاكل .. خلينا نروح نسهر سهرتنا بمزاج .. أنا كمان لازم أقابل بقية الشلة هناك




يوصلوا زأططة .. المكان آآآآآآآآآآخر ...... زأططة .. يدخل إبليس ومعاه أبوجهل .. أبوجهل يبص للمنظر .. الأنوار الحمرا .. والدخان الازرق .. والموسيقى الصاخبة .. ضحكات السكارى تتردد في كل مكان .. والرقص شغال .. ومش هنتكلم على اللبس .. آخر زأططة



أبو جهل يتردد في الدخول .. المكان شكله يخض .. يستقبلوه كام واحدة من تلاميذ مزمزة هانم .. بس متفوقين عيها شوية .. التفوق حلو برضه



- أهلاااااااان .. إبليس بيه .. من زمان ما جيتش يا راجل



- كده برضه .. احنا زعلناك في حاجة



- ومين صاحبك ده .. شيك أوي اللبس اللي انت لابسه دهاتنين يا خدوه بعيد عن إبليس .. يقوموا معاه بواجب الضيافة






أبوجهل (دماغه لفـِّت) – إيه الجمال ده .. تصدقوا انتم بتفكروني بدار بن جدعان (خمارة كانت في مكة أيام الجاهلية)



- دار مين .. ؟؟ .. انت شكلك كده من دولة عربية



- طبعا .. أنا من قريش



- قريش .. والله دمك زي العسل .. تشرب ايه بقى .. ؟؟



- ممكن اشرب لي كاسين خمرة ؟؟



- طبعا .. بس كده .. هنا فيه كل حاجة



- كل حاجة ؟؟ .. بس يعني لو المسلمين عرفوا مش هيعملوا لي حاجة ؟



- حاجة إيه ؟؟ .. ما كلنا مسلمين وموحدين بالله .. إنت إيه حكايتك بالضبط ؟؟



- نعم ؟؟ .. كلكم مسلمين ؟؟ .. أصل يعنييييييييي .. إبليس بيه قاللي كلام يخوف .. وإن المسلمين مش بيشربوا خمرة .. وممكن يضربونا .. وحوارات كده



- لا لا .. دي نقرة ودي نقرة .. وبعدين احنا شغلتنا كده .. أكل عيشنا .. وربنا يتوب علينا بقى .. إنت هتقلب لنا الليلة عكننة ليه .. ؟؟



إبليس ييجي- إيه بس يا جماعة .. فيه إيه ؟



- صاحبك ده غريب أوي .. هو أول مرة ييجي عندنا وللا إيه ؟؟ ..



- معلش معلش .. آخر مرة .. فضحتني منك لله .. ماتعيش حياتك يا أخي وخلاص .. لزومه ايه كتر الكلام



- مش انت اللي قلت لي الخمرة حرام



- طيب .. بس .. بس .. تعالى عشان عايز اعرفك على بقية الشلة






يقعدوا مع أربعة من اصحاب ابليس بيه .. يظبطوا عشان بكره الانتخابات



واحد – والله يا إبليس بيه مش عارفين نودي جمايلك فين .. خيرك مغرقني والله يا باشا



إبليس – انت بالذات ما تتكلمش .. مش انت بعد كل اللي عملته معاك السنين اللي فاتت .. رحت لك المكتب لقيتك معلق لي لوحة كاتب عليها ( هذا من فضل ربي ) .. ده جزاتي ؟؟



نفس الواحد – ههههههه .. انت زعلت ياراجل .. لالا مالكش حق .. وبعدين دي كانت جاية لي هدية من واحدة عزيزة عليا أوي .. وما قدرش اكسفها



التاني – شوف بقى سعادتك .. احنا ظبطنا كل حاجة .. وآدي البطايق اللي عملناها للناس بتوعنا .. اسمنا احنا الاتنين فيها اهو .. ووزعناها على ناس كتير أوي



الأول – ودول البودي جاردز بتوعنا .. كل واحد سلاحه معاه .. واللي هيقف في سكتنا هيخلصوا عليه



أبو جهل – أهو كده الشغل .. أنا معاكم يا رجالة .. وسلاحي جاهز .. وهاقف معاكم بكره



الأول – انت ما عرفتناش على صاحبك يا باشا .. مش تعرفنا



إبليس – ده عمرو صاحبي .. خبير في مكافحة الإرهاب .. خبرة سنين طويلة جدا .. جبته عشان يساعدنا اليومين دول



التاني – إيه العظمة دي .. ميه ميه .. نشرب بقى في صحة الإرهاب .. هاهاهاهاها



يشربوا كلهم



الأول – خلاص بقى .. انت معايا من بكره يا عمرو بيه .. إيه رأيك تكون مرافق ليا ؟



أبو جهل – خلاص أنا معاك .. كلام رجالة



الأول – طب يا جماعة .. هاستأذنكم أنا .. أشوفكوا بكره بقى .. في صحتكم وفي صحة بكره



صوت الراقصة عالي جدا .. أبوجهل قاعد يصقف على الإيقاع .. شوية شوية وهيقوم يرقص .. الراقصة تلاحظ حماسه .. تغمز له بعينها وتغني



والعب العب العب .. آه ياسيدي

العب لعب العب .. آه يا عيني






(أبو جهل يوطي على إبليس ) – بتقوللي انا ؟؟ أنا العب ؟؟






إبليس – لا لا .. ده الأغنية بتقول كده .. أقعد يا اخي



أبو جهل يقوم – سيبني يا عم .. دي بتقوللي انا .. أنا هاروح العب




إبليس – ياعم اقعد بقى .. هابقى اخليك تلعب .. بس بعدين بعدين


أصحاب إبليس ميتين على روحهم من الضحك .. وأبو جهل يبص لأبليس بغيظ .. ويقعد


يشربوا كاسين .. وعقدة اللسان تتحل شوية شوية



التاني (بيتكلم على المرشح زميله) – ياساتر .. الجدع ده حقنة .. أهو خلع اهه .. بص بقى يا إبليس بيه .. أنا اتخنقت من الجدع ده .. وبصراحة هو اللي هيخسرني لو فضلت معاه .. وانا مش صارف عشرة مليون عشان اخسر



ابليس – ياعم استحمله .. هو حقنة فعلا .. بس اصحابك اللي حاطينه .. نعمل لهم ايه .. عندك حل تاني ؟



التاني – آه .. شوف .. مش ده الورق اللي ورا هولك فيه اسمنا احنا الاتنين



إبليس – آه

التاني – شوف الورق ده .. ده فيه اسمي مع مرشح تاني .. كده ممكن اكسب .. ونقلب الجدع البارد ده .. أنا عارف



اختاروه على ايه



أبو جهل – تقلبه يعني إيه ؟






التاني – نقلبه ياعم .. نزحلقه .. هو كان من بقية أهالينا



أبوجهل – يعني هتقول لأصحابك يختاروك انت وواحد تاني غيره



التاني – عليك نووووووور



جهل – بس انا اديت الراجل كلمة اني اقف معاه .. دي تبقى خيانة



التاني – إيه ؟؟ خيانة ؟؟ .. انت هتديني درس في الأخلاق .. انت معايا وللا معاه ؟؟



أبو جهل – لا واللات والعزى .. لا تحدث العرب أني حنثت بوعدي أبدا



التاني – هاهاهاهااااااااااي .. حلوة .. بقولك ايه .. ماتبقاش تشرب كتير بعد كده .. انت شكلك كده مش قد الحاجات دي



أبو جهل – إيه ده يا إبليس .. فيه كده ؟



إبليس – أمال يا بني .. انت لسه شفت حاجة ؟؟ .. ده انا عندي حاجات تشيب .. ياللا بينا مش عايزين نسهر اكتر من كده .. لازم نصحى بدري بكره



أبو جهل – أحسن والله .. المكان ده موبوء .. أنا اتخنقت منه



يروحوا البيت قرب الفجر .. إبليس ينام ويشخر .. أبوجهل مش جاي له نوم .. أول مرة يسافر بعيد كده ومش واخد



عالغربة



يسمع الأذان .. يبص عالجامع .. مافيش حد رايح الجامع .. كل شوية واحد يدخل .. تمن تسع تنفار بالكتير .. يبتسم في رضا .. أهوكده الشغل وللا بلاش .. خليه يدّن في مالطة



يحاول ينام .. بعد شوية يسمع أصوات في الشارع .. يبص من الشباك



شباب كتير خارجين من الجامع .. معاهم لوحات .. إيه اللي مكتوب عليها ده .. الإسلام هو الحل .. تااااااني ؟؟ ..



كانوا فين دول ؟؟ بايتين في الجامع وللا إيه ؟؟



يحاول يسمع اللي بيقولوه .. كانوا بايتين في الجامع فعلا .. سهرانين طول الليل بيجهزوا الدعاية .. ويصلوا ويدعوا ربنا .. شكلهم فعلا ما ناموش .. يصَـحّى إبليس



أبو جهل – إصحى يا جدع انت .. اصحى .. أصحاب محمد تحت اهم



إبليس – فيه ايه يا أخي ؟؟ .. بتصحيني من عز النوم ليه



أبوجهل – أصحاب محمد تحت أهم .. بص شكلهم عامل ازاي .. دول شبه اللي كانوا عندنا في مكة بالضبط .. اعمل أي حاجة .. هتسيبهم كده



إبليس – اطمن انت بس .. مش قلت لك كل شيء محسوب حسابه .. نام انت والصباح رباح



أبو جهل – أنام ازاي .. بص بيسلموا على بعض ازاي .. دول شكلهم بيحبوا بعض أوي .. انت ازاي سايبهم كده .. ؟؟ .. انا هاخد السيف وانزل لهم

ابليس – سيف ايه بس بلاش فضايح .. سيبهم لي وانا هاتصرف .. انت تتفرج بس .. نام بقى



أبو جهل – طيب هانام .. أما نشوف آخرتها


وخلينا سوا نشوف آخرتها الحلقة الجاية ان شاء الله .

الحلقة الثالثة
سبنا أبو جهل وصديقه إبليس نايمين .. صحيوا متأخر من الهباب اللي كانوا بيشربوه طول الليل




إبليس – إبو الحكم .. أبو الحكم .. إصحى .. قوم

أبو جهل – عايز ايه يا إبليس .. ما تسيبني أنام شوية يا أخي



إبليس – يا عم قوم .. اتأخرنا قوي .. ورايا كام مشوار مهمين



أبو جهل – طيب طيب .. هاقوم اهه




ينزل أبو جهل وإبليس .. أبو جهل يسترعي انتباهه البوسترات الكبيرة بتاعة المغنيات .. والراقصات .. وكل حاجة في آخرها آآآآآآت






أبو جهل – صور مين دول يا إبليس .. ومين اللي صورهم قبل ما يلبسوا كده ؟



إبليس – يا أخي انت هتفضل متخلف كده على طول .. أولا دي صورهم وهم لابسين .. هم هدومهم .. كده .. ثانيا دول يابني نجوم المجتمع .. الشباب ممكن يقعدوا يسمعوهم ساعتين تلاتة عشرة يرقصوا ويغنوا مافيش مشاكل



أبو جهل – مسلمين برضه ؟



إبليس – طبعا امال ايه .. مش قالوا لك دي نقرة ودي نقرة ؟؟



أبو جهل – طب سؤال أخير .. الله يخليك



إبليس – إسأل .. بس بلاش أسئلة غبية



أبو جهل – أنا أصلي ما شفتش حد خالص من يوم ما جيت بيقرا قرآن .. هو القرآن ملغى السنة دي ؟؟



إبليس – لا يا غشيم .. أنا خليت الناس تحب الأغاني دي قوي .. فماحدش منهم بقى عنده مزاج يقرا قرآن ولا يسمعه حتى



أبو جهل – أصل محمد وأصحابه ما كانش ليهم شغلانة غير قراية القرآن .. لما خلوا الواحد مش عارف يعيش في مكة .. ده المسلمين الزمان ده



احسن كتير بصراحة .. الله ينور يا إبليس يا حبيبي



إبليس – وعليك يا باشا






ماشيين في أمان الله .. فجأة عربية من ناحية اليمين كاسرة الإشارة ومنطلقة بأقصى سرعة .. السائق بيدوس فرامل بشدة وراح لابس في عربية الغلابة أبو جهل وإبليس



ينزل السائق .. يشتم بكلام بذئ جدا .. وينهال بالضرب على أبي جهل المذهول من الموقف .. وإبليس يحاول يخلصه .. والناس واقفة تتفرج






السائق – انت حمار ؟؟ .. انا نفسي اعرف مين ابن .... اللي علمك السواقة .. الله يخرب بيت ....



إبليس – انت اللي غلطان وكاسر الإشارة .. وكمان بتشتم ؟؟



السائق – أقسم بالله العظيم .. أقسم بعزة جلال الله .. انت اللي غلطان .. إنت اللي كاسر الإشارة .. انت ما بتشوفش يا بهيم انت



أبو جهل – وبتحلف كذب يا راجل انت ؟؟ يعني غلطان وتحلف كذب ؟؟



(يميل على إبليس) - مسلم ده برضه ؟؟



إبليس – آه طبعا .. انت مش شايفه بيحلف بالله ؟






أمين الشرطة يقرب منهم .. الراجل السواق راح غامزه ببريزتين ..






أمين الشرطة لإبليس – انت اللي كنت سايق ؟؟ .. رخصك لو سمحت



إبليس – رخصي ليه ؟؟ .. ده هو اللي كاسر الإشارة وغلطان



العسكري – انت هتشوف احسن مني .. وللا هتعلمني شغلي



أبوجهل لأمين الشرطة – ياراجل انت .. أنا شايفه بيديك فلوس .. انت مسلم انت ؟؟ .. بتشهد زور يا مفتري ؟؟



أمين الشرطة – إنت كمان هتقل أدبك ؟؟ .. طب بطاقتك بقى .. أنا هاعمل لك محضر تعدي



ابو جهل يضرب كف على كف ويقول لإبليس – ياعم هي الناس جرالها ايه ؟؟ رجعني بلدنا احسن .. أنا بصراحة مش مصدق اللي باشوفه ده






إبليس يحاول يتصل من الموبيل .. الموبيل مش بينطق .. ورطة






أمين الشرطة للسائق – طلباتك يا باشا



السائق يشاور لأبوجهل – لا .. ولا حاجة .. أنا هاسيبهم عشان خاطر الشيخ ده بس .. بس يبقوا يخلوا بالهم وهم سايقين بعد كده



يمشي أبو جهل وإبليس .. إبليس هيتجنن




إبليس – حاجة تجن .. أنا ما علمتهمش كده أبدا .. نفسي اعرف مين الشيطان اللي معاه ده أشوف ازاي يعلمه المسخرة دي .. وكمان الموبيل .. لسه شاريه امبارح .. مهنج ومش عايز يشتغل .. تعال نروح نشوف ايه حكايته






يدخلوا محل الموبيلات .. محل محترم جدا .. بائعة على سنجة عشرة .. تستقبله بابتسامة ساحرة




البائعة – سباح الخييييير .. تهت أمرك



إبليس .. بغيظ – الموبيل ده أنا اشتريته من هنا امبارح .. ما بيشتغلش



البائعة تجرب الموبيل – آه .. سحيح .. ده مش بيشتغل .. ليه كده ؟؟



إبليس – هو إيه اللي ليه كده ؟؟ .. مش انتوا اللي بايعينه



البائعة – أسلي باكون موجودة السـُّبح بس .. (تغمز لابوجهل) .. بعد الدُهر ورايا شغل تاني .. هي هي هي .. استنوا زميلتي بتاعة بالليل



إبو جهل لإبليس – إيه ده يا بيسو .. هي تبع مزمزة هانم وللا إيه ؟؟



إبليس – يا اخي احنا ف إيه وللا ف إيه دلوقت .. بصي يا ست انتي .. أنا مش هاستنى لبالليل .. الموبيل ده من عندكم .. افتحيه وشوفي الشريحة .. انتي مش عارفة الأرقام اللي تبعكم ؟؟



البائعة ترتبك – لا لا ما تفتحوش .. ممكن تخسر الدَّمان



إبليس – ضمان ايه وبتاع ايه .. افتحيه ومالكيش دعوة .. مش عايز ضمان






تفتح الموبيل .. الموبيل مصدي من جوه .. وشكله مستعمل بقاله عشر سنين






إبليس – ياحرامية يا غشاشين .. الموبيل ده انا شاريه جديد .. إنتم بدلتوه في الخباثة



البائعة تردح له – باقول لك ايه ياجدع انت .. هو إيه تلاقيح الجتت ده .. انت هتتبلي عليا وللا ايه ؟؟ .. انت هتغور من هنا وللا اعمل لك محضر انك بتتهجم عليا ؟؟



إبليس – أنا جيت جنبك يا ولية انتي ؟؟



البائعة تصرخ – يالهويييييييييي .. الحقونييييييييييي . حرامييييييييييييي




إبليس وأبو جهل يجروا بره المحل .. يركبوا العربية .. ويا فكييييييييييك






إبو جهل – ههههههههه .. والله برافو عليك يا إبليس .. فعلا عامل شغل ميه ميه



إبليس – المشكلة ان انا مش قادر احصل الناس دول .. كل ما افكر في حاجة شيطانية ألاقيهم سبقوني






يوصلوا منطقة شعبية .. حالتها صعبة أوي .. بؤس وفقر ومجاري .. حاجة فظيعة






أبو جهل – يا ساتر .. ايه القرف ده .. ايه المكان ده يا إبليس ؟



إبليس – أنا ليا واحد صاحبي هنا .. واخد توكيل توزيع البانجو في البلد .. ولازم كل ما آجي اطمن عليه



أبو جهل – بس الناس دي عايشة هنا ازاي كده .. امال الحتة اللي كنا فيها امبارح كانت نضيفة أوي .. معقول دي بلد واحدة



إبليس – آه طبعا .. بس حبة فوق وحبة تحت .. مش قلت لك ان اصحابي الحرامية الكبار سرقوا البلد .. أخدوا فلوس الناس دول وسكنوا في حتت نضيفة ومحترمة ودول بقى عايشين في الفقر ده



أبو جهل – أنا باعمل كده بصراحة .. وكتير كنت باكل على الناس فلوسها .. واشغلهم بالسخرة .. واللي يتكلم يبقى يا ويله .. بس ماكنتش فاكر المسلمين برضه كده .. انت عارف ابوبكر صاحب محمد؟؟



ابليس – ابن أبي قحافة ؟؟ .. ياااااه .. انا ما باكرهش في الدنيا دي قده



أبو جهل – أهو انت عارف أبو بكر ده ؟؟ .. مرة اشترى تلات عبيد من فلوسه عشان كنا بنعذبهم عشان يكفروا بدين محمد ويرجعوا لديننا .. مع ان العبيد دول ولا هينفعهوه بحاجة



إبليس- لا اطمن .. دلوقت أنا ظبطت الناس أوي .. ماحدش بيخدم حد غير لما يكون عنده مصلحة .. عايز منه حاجة .. مافيش حاجة ابدا لوجه الله






يلمح أبوجهل مجموعة من الشباب .. لابسين تي شيرتات مكتوب عليها صناع الحياة .. واقفين وحواليهم مجموعة من الأهالي .. يقرب منهم هو وإبليس






واحد من الفريق – وياريت يا جماعة نحاول نخلص النهارده ان شاء الله .. الموضوع محتاج جهد جامد .. بس انتم شايفين الوضع صعب ازاي من غير مَيـّه



أحد الأهالي – ربنا يوفقكم يا بني .. والله أهل الحتة كلها بيدعوا لكم .. مش عارفين نشكركم ازاي



واحد من الفريق – يا حاج ما تقولش كده .. احنا محتاجين الثواب أكتر مانتم محتاجين الميه .. احنا اللي بنشكركم انكم اديتونا الفرصة دي .. والناس لبعضيها برضه



أبو جهل يقرب منهم – هو فيه إيه .. بتعملوا ايه هنا ؟؟



واحد من الفريق – إحنا يا عم الحاج جايين ندخل الميه الحلوة للمنطقة .. لإنها عشوائية والناس بتشرب ميه ملوثة .. واحنا جمعية خيرية وبنحاول نساعد الناس قد مانقدر



أبو جهل – وهتاخدوا منهم كام في الشغلانة دي ؟؟



واحد من الفريق – لا .. أهل الخير كتير .. ناس اتبرعت بالمواد .. وناس خلصت لنا الإجراءات في الحي .. واحنا هنعمل أقل حاجة .. هنوصل المواسير للبيوت



أبو جهل يبص لإبليس بغيظ – إيه يا إبليس العيال دول ؟؟ .. انت مش قلت لي انك ظبطت الناس .. وكله بالمصالح وماحدش بيخدم حد ؟؟



إبليس (بخزي) – بس بس ما تحسرنيش .. أنا عايز الأرض تنشق وتبلعني .. بس سيبك انت .. انا هاشتغل عليهم دلوقت .. هأخلي كل واحد منهم نيته تتغير .. وبدل ما بيشتغل لله يقعد يستنى نظرات الإعجاب من الناس .. يتعب بقى زي ما يتعب .. في الآخر ولا حسنة واحدة .. سيبني بس أركز



رئيس الفريق للمجموعة – طيب يا جماعة اسمحوا لي .. قبل ما نبدأ الشغل بس كل واحد يجدد نيته .. ويحتسب أجره عند الله سبحانه وتعالى .. انتم عارفين الشيطان بيجري من ابن آدم مجرى الدم .. استعيذوا بالله من الشيطان الرجيم .. ياللا توكلوا على الله






إبليس يتضاءل جدا .. يصغر .. يصغر .. يصغر من الاستعاذة بالله .. أبو جهل يبعد من المكان بأقصى سرعة وهو في قمة الغضب .. ينطلق صوت الأذان .. صوت عذب وجميل جدا






الله أكبر الله أكبر الله أكبر الله أكبر



أشهد أن لا إله إلا الله



أشهد أن محمدا رسول الله






الشباب يسيبوا اللي في إيديهم ويتجهوا أفواج للمسجد .. ابتسامة جميلة على وجوههم .. الابتسامة اللي أبو جهل بيكرهها .. وبتفكره بأصحاب محمد .. الأهالي يتجهوا للمسجد بأعداد كبيرة .. ينفجر من شدة الحسرة والغضب .. إبليس يرجع وياخده بسرعة عشان يهربوا من المكان .. يروح يلاقي مفاجأة سارة في انتظاره






العربية اتسرقت .. تلاميذه شغالين كويس .. الحمد لله .. الدنيا بخير .. هههههههه






انتظرونا في الحلقة القادمه

الحلقة الرابعة
سبنا أبو جهل وإبليس وهم دايخين في الشارع بعد ما عربية إبليس اتسرقت .. إبليس هيتجنن لإنه مش عارف يتصرف أو يتصل بأصحابه لإن الموبيل عطلان .. أبوجهل مابين انه فرحان جدا بأخلاق المسلمين البايظة .. وبين انه متضايق عشان حركة العربية



إبليس مش عارف يتصرف .. الشباب حسوا ان فيه مشكلة .. توجهوا لمساعدتهم






واحد (يوجه الحديث لأبو جهل) – خير ان شاء الله يا حاج .. فيه حاجة ؟؟



أبوجهل – العربية اتسرقت .. أنا مش عارف ايه اللي بيحصل في البلد دي



واحد ( يحس بلكنة غريبة في كلام أبو جهل .. يفتكره سايح ) – لامؤاخذة يا حاج والله .. حاجة تكسف .. حضرتك بس اتفضل معانا نصلي سوا .. ونحاول نتصرف بعد الصلاة ان شاء الله .. اتفضل اتفضل



بقية الشباب – أيوه .. نصلي سوا وربنا يحلها ان شاء الله



أبو جهل ( يبص لإبليس ) – لأ .. أصل .. يعنيييييييي



إبليس يختفي فجأة .. فص ملح وداب .. وأبو جهل يلاقي نفسه مدفوع دفعا للجامع .. يدخل مع الشباب .. ويروح على الحمام فرارا من الصلاة .. لحد ما الصلاة تخلص



واحد من الشباب .. يسلم على أبو جهل بعد الصلاة – تقبل الله يا حاج .. أمال فين الأستاذ اللي كان مع حضرتك ؟؟



أبو جهل – ده صلى وطلع على طول بعد الصلاة .. موضوع العربية شاغله أوي



واحد تاني – ولا يهمك .. إن شاء الله نتصرف .. ياللا بينا



أبو جهل يدور على حذائه .. يدور .. يدور .. يدور .. حزروووووووووا حصل إيه .. أيوه بالضبط كده .. مع الأسف الشديد .. جزمته اتسرقت .. إخص على كده



أبو جهل – إيه يابني ده .. معقول الجزمة تتسرق في الجامع ؟؟ .. معقول ؟؟ هم المسلمين دلوقت بقوا كلهم كده ؟؟






الشباب في نص هدومهم .. واحد منهم يتطوع بحذائه عشان الراجل الغريب



– معلش والله يا حاج .. مش عارفين نقولك ايه .. للأسف بعض الناس بتسيء للإسلام جدا .. ربنا ينتقم منهم .. اتفضل حضرتك .. البس الجزمة دي وان شاء الله تطلع على مقاسك






أبو جهل ياخد الحذاء وهو مضطر .. يلبسه ويطلع .. ياخد إبليس على جنب ويمسك فيه






أبو جهل – وكمان يسرقوا جزمتي .. لااااااا .. ده انت زودتها أوي



إبليس – معلش .. جت فيك يا عمور .. أصل جزمتك غالية .. لقطة بقى .. هههههههه .. انت عارف .. أنا حرّمت ناس كتير أوي يخشوا الجوامع بسبب المواضيع دي .. واللي بيصلي مابقاش عارف يركز في الصلاة وللا يبص على الجزمة



أبو جهل – المهم .. هنعمل إيه دلوقت في موضوع العربية



إبليس – أمرنا لله بقى .. نشوف الشباب دول يساعدونا



يوجه كلامه للشباب – نروح نبلغ البوليس .. وللا نعمل ايه في موضوع العربية ده ؟؟



واحد من أهل المنطقة – إزاي بقى .. ده انتم ضيوفنا .. سيبنا احنا نتصرف ونجيب العيال اللي سرقوا العربية دول من تحت الأرض



شوية كده .. ويظهر واحد معلم كبير من أهل المنطقة .. ومعاه عيلين .. ينزل فيهم ضرب






المعلم – فين ياد انت وهو الوله زقزوق



ولد منهم – آآآآي .. والله ما عرف يا معلم .. آآآآآآآآآي .. قفايا ورم حرام عليك



المعلم – اوع تكون فاكر نفسك عند الحكومة وهنطبطب عليك .. ده انا هاعلقك هنا لو ما جبتليش الواد ده في ساعة تاريخه



الولد – آآآآآىي .. حاضر يا معلم .. هاجيبه .. هاجيبه






إبليس لإبو جهل – يا نهار اسود .. زقزوق ؟؟



إبو جهل – انت تعرفه ؟



إبليس – أيوه .. ماهو ده صاحبي اللي كنت جاي له



أبو جهل – أيوه .. كده صح .. ماهو انت هتعرف مين غيره ؟؟ .. بس برافو عليك .. عرفت تربي



أبليس – أربي .. ده انا هاديله جـِـزا .. مالقاش غير عربيتي يسرقها



إبو جهل – عشان تحرم تسلط اصحابك على جزمتي



شوية كده وتظهر العربية .. والمعلم الكبير يعتذر لإبليس






المعلم – لا مؤاخذة ياباشا .. عربية سعادتك سليمة اهي .. والواد زقزوق تاويناه .. وآخر مرة ياباشا



إبليس – شكرا يا معلم .. أنا مش عارف من غيرك كنت هاعمل ايه






ينطلق إبليس وأبو جهل بالعربية .. فجأة أبو جهل يحس بآلام شديدة في بطنه






أبو جهل – بطني .. آآآآآآه .. إلحقني يا إبليس .. مغص جامد أوي



إبليس – سلامتك يا أبا الحكم .. مالك .. فيه إيه ؟؟



أبو جهل – سكاكين بتقطع في بطني .. ألم رهيب



إبليس – طيب .. نطلع على المستشفى حالا



يطلعوا على مستشفى خاص جدا .. جدا .. جدا .. واستثماري جدا .. جدا .. جدا



يدخلوا المستشفى .. الممرضات في الاستقبال يلمحوا شكل أبو جهل .. باين طبعا انه سايح .. كله يقوم يعرض خدماته



مناظر الممرضات في الاستقبال خلت أبو جهل ينسى اللي هو فيه .. أشد من أي مسكن آلام .. بقى ماشي عينيه في وسط راسه



أبو جهل لإبليس – ايه ده يا إبليس .. انت متأكد ان احنا في مستشفى مش في زأططة



إبليس – وطي صوتك ماتفضحناش .. هو الطب الحديث كده .. العلاج من أول نظرة



أبو جهل – بقى كده .. والله انت ميه ميه .. طب خلينا نشوف شغلنا احسن أنا حاسس ان روحي هتطلع



يتجهوا للدكتور .. إبليس يشرح له الموقف .. الدكتور يأمر بتحويل أبو جهل عشان يعمل رسم قلب






إبليس – رسم قلب إيه يا دكتور .. الراجل بطنه واجعاه .. مش قلبه



الدكتور – انت هتعلمني شغلي . ما تيجي تكشف انت وبلاش انا .. لو سمحت اتفضل انت بره .. يا سوسو .. خدي الأستاذ عشان رسم القلب



سوسو لأبو جهل – اتفدّل يا أستاذ .. بسيتة خالس .. جاست فايف مينيتس



يمشي معاها أبو جهل زي المسحور .. معقول سوسو دي هي اللي هتعمل له رسم القلب .. ايه الهنا ده .. رسم قلب رسم قلب .. بس نعيش



تدخل سوسو وأبو جهل غرفة رسم القلب .. أبو جهل ينام على السرير .. يغمض عينيه وهو في قمة السعادة



سوسو تنادي على زميلتها – يا حفيظة .. حفيظة .. تعالى عشان تعملي رسم القلب للأستاذ



تلتفت لأبو جهل بابتسامة رائعة – سوري سير .. سي يو



وفي لحظة يلاقي أبو جهل نفسه مع الست حفيظة الحكيمة .. ذات السبعين ربيعا .. تقبض عليه بإحكام وتلف حوالية أسلاك الجهاز .. يفقد أبو جهل النطق .. والسمع .. والبصر .. ويروح في غيبوبة عميقة



يفيق على إيد خشنة تهزه بعنف - خلاص يا حاج .. اتفضل قوم



أبو جهل ( فزعا ) – فيه إيه .. فيه إيه ؟؟



حفيظة – اتفضل على الانتظار .. رسم القلب خلص



يطلع أبو جهل .. يلاقي الدكتور بيتكلم مع إبليس .. وإبليس مكشر خالص



الدكتور – زي ما بقول لك كده .. ورم في الكلية اليسرى .. لازم تتشال حالا



إبليس – كده ؟؟ .. يشيل الكلية مرة واحدة ؟؟



الدكتور – اطمن خالص ..هو حالته خطيرة .. بس الموضوع أندر كونترول .. ما تقلقش خالص سعادتك .. هو البيه هيدفع بالدولار وللا بالمصري



إبليس – اللي تشوفه سيادتك .. بس الله يخليك .. الراجل ده أمانة في رقبتي .. ولازم أرجعه لأهله صاغ سليم



الدكتور – لا .. لا .. اطمن خالص .. العملية مش هتاخد كتير






ابليس يقعد في الانتظار .. وأبو جهل في غرفة العمليات .. شوية كده وييجي له واحد .. شكله مش غريب .. إبليس شافه فين .. فين .. مش فاكر






الواحد – لامؤاخذة .. مش سعادتك برضه الأستاذ إبليس



إبليس – أيو ه يا بني .. انت تعرفني ؟



الواحد – أيوه .. أنا شيطان من شياطين الإنس .. باشتغل هنا .. اتشرفنا يا فندم



إبليس – أهلا وسهلا .. طيب ياريت توصي الناس اللي هنا عليا .. احسن معايا ضيف هنا وبيعمل عملية



الواحد – ما هو انا جاي لك عشان كده



إبليس – عشان كده .. ليه ؟؟



الواحد – الحكاية بصراحة إن صاحبك سليم .. وما عندوش حاجة .. هو بس صباعه كان مدوحس



إبليس – أمال ايه حكاية الكلية والعملية .. إيه الحكاية ؟



الواحد – حوارات كلها من الآخر كده .. الدكتور ده متفق مع واحد عايز يعمل زرع كلية وهيسرق كلية صاحبك ويبيعهاله بخمسين ألف جنيه .. لولا اني شفتك وعرفت انه صاحبك كنت سبته يسرقه .. ماهو انا اللي باظبط له الحاجات دي .. تربيتك يا باشا



إبليس – الله يخرب بيوتكو .. يا مجرمين .. يا نصابين .. يا فجرة






يقوم إبليس ويخبط على الدكتور .. يطلع الدكتور .. إبليس يمسك فيه .. ويخشوا في حوارات طويلة لحد ما يسيب أبو جهل .. مقابل انه يدفع تمن الكشف ورسم القلب وأجرة طبيب التخدير وحجرين معسل عشان يعدل مزاج الدكتور .. بسيطة خالص عشر تلاف جنيه بس .. يدفعهم إبليس وهو صاغر .. تلاميذه بقى .. هيكسفهم ؟؟



يطلعوا بره المستشفى .. إبليس يحكي لأبو جهل الحكاية .. أبو جهل يموت على نفسه من الضحك .. ويسأل إبليس






أبو جهل – بس قوللي .. الجماعة دول مسلمين برضه ؟



إبليس – أيوه .. ماهم كاتبين في مدخل المستشفى .. لا إله إلا الله



أبوجهل – آه .. آه .. مادام مكتوب عليها .. يبقوا أكيد مسلمين



إبليس – طيب أنا بقى هانسيك كل القرف اللي شفته اليومين دول .. وهاعيشك في جو ميه ميه .. هتنسى نفسك



أبوجهل – آه .. تعال نروح زأططة .. انت مش قلت لي هاخليك تلعب ؟؟



إبليس – لا ياراجل .. زأططة إيه وبتاع ايه .. احنا هنروح نسهر النهارده سهرة حكاية .. البلد كلها بتسهر اليوم ده .. بمناسبة الكريسماس



إبو جهل – الكريسماس .. بس ده مش عيد المسلمين



إبليس – وماله .. بس أنا علمتهم يحتفلوا بيه كل سنة .. لغاية ما بقت عادة عندهم .. ويشربوا ويرقصوا .. وووووو يهيسوا



أبو جهل – لا لا ياراجل .. معقول ؟



إبليس – طب انت هتشوف بنفسك .. أدي احنا وصلنا أهو






يدخلوا قاعة الاحتفال .. فندق عشر نجوم .. كل نجم انقح من اللي جنبه .. نجوم ايه بقى .. ولا نجوم هوليود .. أبو جهل يفرك عينيه بشدة .. أنا في حلم وللا في علم .. رقص وهيصة وسكر ومسخرة .. مش ممكن .. مش ممكن .. أبو جهل شرِب وهيّص ورَقَص .. وفجأة .. النور انطفى .. وبدأ يسمع همهمات غريبة حواليه






أبو جهل – إيه ده يا إبليس .. كبسة دي وللا إيه ؟



أبليس – لا .. دي بقى أحلى لحظة في الليلة كلها .. النور بينطفي وكل واحد هو ونصيبه



أبو جهل – يعني إيه هو ونصيبه



إبليس – دلوقت تشوف






فجأة أبو جهل لقى إيدين رقيقة تتلف حوالين رقبته .. وواحدة بتكلمه بهمسات حالمة .. دارت رأسه .. وكان هيقع على الأرض لولا إنه وقع بين إيديها .. استرخى وهو بيحلم أحلام سعيدة جدا .. ياترى دي كانت الشقرا اللي جنبه .. وللا اللي لابسة فستان ازرق ؟؟



وفجأة .. رجع النور .. ابتسم ابتسامة رقيقة .. وفتح عينيه عشان يشوف هو بين إيدين مين .. يا سلاااااااااااااام .. مين ؟؟ .. حفيظااااااااااااااا .. لااااااااااااء .. الحقونيييييييييي .. هي حفيظة بتاعة مستشفى الحرامية .. الله يخرب بيتك يا إبليس الـ ...... جري من بين إيديها فزعا .. وخد إبليس وطلعوا جري



الجرسون مستنيهم على الباب – الحساب يا حضرات



إبليس – معلش يا بو جهل حاسب انت عشان صرفت الكاش اللي معايا في المستشفى



إبو جهل – أوي أوي



يمد إيده في جيبه .. المحفظة .. المحفظة .. المحفظاااااا .. اتسرقت يا إبليس .. اتنشلت .. كده برضه يا حفيظة .. وآدي آخرة اللي يمشى ورا الشيطان



هيتبع .. مش هيتبع .. هيتبع .. مش هيتبع .. ههههههههه .. تحياتي

الحلقة الخامسة
سبنا أبوجهل وإبليس فين يا شباب فيييييييين ؟؟ .. آه .. في موقف لا يحسدوا عليه أمام الجرسون وهو بيبص لهم شذرا عشان أبو جهل معاهوش فلوس .. وحكاية المحفظة دي يعني !!!! .. شكله شاف أشكال من دي كتير قبل كده .. المهم .. إبليس أنقذ الموقف بكارت الفيزا .. دفع المبلغ صاغرا .. وخرجوا من الفندق جرى .. وصلوا مكان العربية .. مافيش عربية .. آآآآآآآآآه .. بس المرة دي الونش .. مش الحرامية .. وبعدين في المطب ده .. لا معاهم فلوس ولا عربية .. وأبو جهل من غير بطاقة .. في موقف لا يحسدوا عليه بصراحة



سألوا فين مكتب المرور ؟؟ في آخر الدنيا .. مشواااااااار .. برد .. ومطر .. حالتهم تصعب على الكافر .. هههههههه .. وشوية ولقوا القزايز بتتحدف عليهم من الشبابيك .. والصواريخ .. وفين يوجعك .. يادي الـ ...




أبو جهل – إيه يا إبليس ده .. بيحدفوا علينا القزايز ليه ؟؟ وإيه النار دي ؟؟



إبليس – لا ماتاخدش في بالك .. دي عادة انا عودتهم عليها .. آخر يوم في السنة يرموا القزايز من الشبابيك عشان تاخد معها الذنوب بتاعة السنة .. ويبدأوا من جديد ذنوب جديدة وأعمال شريرة أكتر



أبو جهل – ومعقول فيه حد بيصدق التخلف ده ؟؟



إبليس – كتير يا بو الحكم يا حبيبي .. أديك شايف اهوه .. الشيطان شاطر



أبو جهل – معقول حالهم وصل للدرجة دي؟؟.. ده انت كده بصراحة



إبليس – المهم بقى هنعمل ايه في الورطة اللي احنا فيها دي ؟؟ .. لازم نشاور لعربية توصلنا لغاية المرور .. معاناش فكة نركب تاكسي





يشاوروا لعدة عربيات .. اللي يطنشهم ويجري ..



واللي يعمل نفسه هيقف ويهوشهم وبرضه يجري ..



واللي يقرب منهم ويطرطش عليهم مية المطر .. ويجري



لحد ما نفسهم انقطع وغرقوا ميه



شوية وعربية قربت منهم .. بعدوا عنها احسن تطرطش عليهم .. وقفت العربية والشاب اللي سايق العربية شاور لهم يركبوا .. نطوا جوه العربية مش مصدقين نفسهم .. لقوا مفاجأة صعبة أوي أوي



الشاب مشغل قرآن في العربية .. إيه الحظ ده يا ناس .. إبليس بقى عمال الأرض تنخسف بيه ويتوجع ويتلوى من القرآن ..وأبو جهل ما بين انه متضايق جدا .. وبين انه قاعد يسمع وبيتلذذ جدا بجمال القرآن ..




الشاب – معلش يا جماعة .. الجو صعب شوية اليومين دول .. تحت أمركم .. تحبوا أوصلكم فين ؟؟



أبو جهل – لامؤاخذة يا بني .. العربية الونش سحبها .. وعايزين نروح المرور نجيبها



الشاب – نروح حالا ان شاء الله .. أنا قلت برضه مش معقول حد يخرج يتمشى في يوم زي ده



أبوجهل – طبعا أكيد كله مهيص النهارده وبيحتفل بالكريسماس .. إنت أكيد جاي من حفلة



الشاب – أعوذ بالله .. لا ياحاج أنا زيكم كده ان شاء الله .. ماليش في الحاجات دي .. اللي يحب القرآن ما يروحش الأماكن دي



أبو جهل – يعني معقول مش بتحتفل راس السنة ؟



الشاب – باحتفل بيه بطريقتي .. هههههه .. مش احتفال طبعا .. بس اليوم ده مش هاعديه كده ان شاء الله



أبو جهل – مش فاهم .. يعني بتحتفل وللا مش بتحتفل ؟؟



الشاب – أقول لحضرتك .. أنا وجماعة اصحابي كده قعدنا نحسبها كده .. لقينا النهارده هيبقى أول ليلة من ليالي العشر الأوائل في شهر ذي الحجة .. ودي أيام فضل العمل الصالح فيها كبير جدا .. فقلنا في الوقت اللي الناس فيه غرقانة في المعاصي احنا نعمل عمل صالح ونتجمع على الصلاة وتلاوة القرآن .. و إمام المسجد اللي جنبنا عمل لنا درس .. وانا كنت معاهم بس نزلت اشتري لهم عشا



أبو جهل – معقول ؟؟ .. فيه حد بيعمل كده دلوقت ؟؟



الشاب – هي يمكن غريبة شوية .. بس اصحابي كتير بيعملوا كده دلوقت .. يعني هو اللي معقول ان الناس ترقص وتسكر لغاية الفجر ؟؟ .. أقول لحضرتك .. إيه رأيكم تيجوا معايا .. شكلكم برضه ما لكمش في السهرات والكلام الفارغ ده .. والله تبقى فرصة كويسة





أبو جهل يتلفت بحثا عن إبليس .. يلاقيه في قمة الرعب من الكلام اللي بيسمعه ووشه عمال يجيب ألوان .. ومش قادر ينطق





أبو جهل – لا يابني .. شكرا شكرا .. احنا يا دوب نوصل المرور عشان نلحق نجيب العربية .. وقتنا ضيق واتأخرنا جدا



الشاب – بس ما يصحش والله أسيبكم في الجو ده .. صدقني يا حاج عادي جدا .. ياريت تشرفونا



أبو جهل – لا يا بني .. شكرا شكرا .. كفاية تعبناك معانا



الشاب – طيب على أي حال احنا وصلنا المرور اهه .. طيب اسمحوا لي بس .. من غير ما تكسفوني .. مادام مش هتيجوا معانا لازم تتعشوا بقى .. كفاية المطرة والبرد اللي في الشارع .. اتفضلوا ( يعزم عليهم بالساندوتشات)



أبو جهل – لا لا .. أنا متعشي .. شكرا .. مش عايز



الشاب – لا لا يمكن .. هازعل جدا والله .. اتفضلوا .. دي مش عزومة





أبو جهل وإبليس ياخدوا الساندوتشات تحت ضغط إلحاحه .. ويسلم عليهم ويمشي



أبو جهل يبص لإبليس .. تقريبا هيعيط من اللي سمعه .. إبليس متغاظ جدا ومش قادر يبص في وش أبو جهل




أبو جهل – إيه الكلام اللي انا سمعته ده يا إبليس .. معقول فيه شباب غير اللي شفناهم في السهرة



إبليس (بحسرة) – أيوه .. فيه



أبو جهل – كتير ؟؟



إبليس – للأسف بدأوا يكتروا اليومين دول .. ومش قادر اعمل لهم حاجة .. أهو شفت الواد ده .. كان مشغل القرآن في العربية .. أجي له منين ده ؟؟



أبو جهل – وبعدين دول مش زي العالم التعبانة اللي بتوديني عندهم دول .. شوف عزم علينا ازاي بالساندوتشات وهو ما يعرفناش .. العالم بتوعك دول كل ما نروح عندهم يقلـّبونا



إبليس – طب خلينا نخلص شغلانة المرور دي ونروح بقى





يدخلوا المرور .. يستلموا العربية .. ويروحوا الفندق .. الاحتفالات لسه شغالة .. داخلين بالعربية .. احتياطات أمن جامدة بره الفندق .. الأمن يوقفهم عند حاجز خارج باب الفندق .. يظهر فيه شخصيات مهمة في الحفلة




رجل الأمن يوجه كلامه لإبليس – لامؤاخذة ياباشا .. الرخصة بس



إبليس – أنا نزيل هنا يابني .. رخصة إيه اللي انت عايزها



رجل الأمن – معلش سعادتك دي تعليمات .. وياريت بطاقة الأستاذ اللي مع حضرتك



إبليس – الرخصة اهي .. بس بصراحة الاستاذ عمرو محفظته ضاعت



رجل الأمن يلاحظ لحية أبو جهل الكبيرة – يعني الأستاذ معاهوش تحقيق شخصية



إبليس – لأ معاهوش .. بس ده تبعي



رجل الأمن ينادي واحد تاني .. يوشوشه ( معاهوش بطاقة .. أكيد إرهابي .. بص دقنه أد إيه )



التاني – التعليمات واضحة .. نتحفظ عليه لغاية ما الحفلة تنتهي



رجل الأمن لإبليس – حضرتك تتفضل .. والأستاذ يرتاح هنا شوية لحد ما الحفلة تخلص



إبليس – يعني إيه ؟؟ .. ده ضيفي .. أنا مش هاتحرك من غيره ؟؟




يتجمع رجال الأمن وفي لحظة يكون أبو جهل معاهم في حراسة مشددة .. وعربية إبليس بتتزق داخل الفندق



الحراسة المشددة توصل أبو جهل لقيادة المجموعة .. أول ما يشوفوه يسألوه عن بطاقته




أبو جهل – بطاقة إيه ؟؟



القائد – بطاقة ايه ؟؟ .. انت بتستهبل ؟؟ .. معاكش بطاقة ؟؟



أبو جهل – ما عرفش ايه البطاقة دي



القائد – ما ينفعش نخلي حد خطر كده قريب من الفندق .. خدوه على القسم .. والصبح نبقى نشوف حكايته إيه





أبو جهل يمشي زي المسحور .. مش عارف إيه اللي بيحصل له .. وفجأة لقى نفسه في وسط مكان ضيق .. قذر .. مظلم .. اترمى فيه .. والباب اتقفلبدأت عينيه تتعود على الظلام .. شوية كده وسمع ضحكات تتردد حواليه




صوت – ده شيخ تاني اهوه .. يظهر ما بقاش وراهم غير المشايخ اليومين دول



صوت – اصحى يا شيخ عمرو .. اصحى جالك شيخ تاني يونسك بدل مانت لوحدك هنا بقالك شهر



صوت – ايه يا حنكورة بس .. بتصحيني من النوم ليه دلوقت ؟



صوت – معانا ضيف جديد اهه .. شيخ من اصحابك




المهندس عمرو يفرك عينيه .. ويبص لابو جهل .. يسلم عليه ويوسع له مكان جنبه




المهندس عمرو- أهلا يا حاج .. لا مؤاخذة المكان هنا ضيق شوية .. بس هتتعود عليه ان شاء الله .. ربنا يسهل وما تطولش كتير



أبو جهل – ايه يابني المكان ده ؟؟



عمرو- معقول يا حاج مش عارف ايه ده .. ده مكان تحت الأرض كده بيحطوا فيه الناس الغير مرغوب فيهم .. لحد ما يبان لهم صاحب



أبو جهل – تحت الأرض يعني إيه ؟؟ .. قبر ؟؟



عمرو – بيتهيألي القبر ممكن يكون أرحم شوية .. بنكون عند ربنا وربنا رحيم بعباده .. بس اللي بره دول .. ما اظنش عندهم رحمة .. انما حضرتك مين واسمك ايه ؟؟



أبو جهل – لا .. دي قصة طويلة .. انا اسمي عمرو .. عمرو هشام



عمرو- معقول .. هههههه .. فرصة جميلة والله .. أنا برضه اسمي عمرو هشام



أبو جهل – وانت معقول بقالك شهر هنا ؟؟



عمرو – أيوه .. افترا بقى .. بس ربنا ما بينساش حد .. أنا اللي شفته من كرم ربنا خلاني انسى الوقت هنا



أبو جهل – كرم إيه يابني وانت في المكان الكئيب ده ؟؟ ده كرم ربنا ؟؟



عمرو – يا حاج .. خللي عندك إيمان بالله .. قدر ربنا كله خير .. أحكي لك وانت تحكم



أبو جهل – احكي




المهندس عمرو كان منظم الحملة الانتخابية لأحد المرشحين في بلدهم تحت شعار الإسلام هو الحل .. ولإن حملة الدعاية كانت نشيطة وقوية جدا .. فالمرشح المنافس مالقاش حل غير القبض على المهندس عمرو ومجموعة من أصحابه لشل حملة الدعاية الانتخابية للمرشح المنافس



وفي يوم رجع المهندس عمرو بيته متأخر بعد جولة انتخابية قوية .. وهو مرهق جدا .. ولكنه سعيد بتوفيق ربنا لهم وإقبال الناس عليهم وتأييدهم لهم



دخل المهندس عمرو بيته .. واستقبلته زوجته .. وابنه محمد .. عمره عشر سنوات .. مقعد ويتحرك على كرسي متحرك بسبب اصابته في حادث عربية من تلات سنين




محمد – بابا .. بابا .. واحشني جدا



عمرو – أهلا محمد حبيبي .. معلش .. اتأخرت عليك كتير .. كلها كام يوم وارجع لك بدري واحكي لك الحدوتة قبل ماتنام زي ما تعودت .. ياااااه .. انت سخن أوي كده ليه ؟؟



زوجته – حرارته تسعة وتلاتين .. ومش عايزة تنزل .. وحاولت اعمل له كمادات .. بس مافيش فايدة .. كل شوية يسخن تاني .. ما كنتش فاكراك هتتأخر كده



عمرو – معلش والله غصب عني .. طيب لبسيه هدومه .. نلحق نروح المستشفى .. مش كويس يستنى كده للصبح



زوجته – طب مش هتاكل لقمة ؟؟ .. أنت أكيد ما تعشيتش



عمرو – لما نرجع .. أنا خايف على محمد أوي .. خلينا نلحق نلاقي حد نوديهوله





تدخل زوجته ومحمد .. وفجأة يسمع طرقات شديدة جدا على الباب .. الباب هينكسر من الطرقات عليه




أصوات – افتح الباب .. هنكسر الباب



عمرو – انت مين ؟؟



الصوت – بنقول افتح .. مش عايز تفتح ؟؟



عمرو- طيب طيب .. هافتح اهه





فجأة الباب ينكسر تحت طرقات كعوب البنادق .. والبيت يتملي مخبرين .. وواحد بملابس مدنية يكلم عمرو بغلظة شديدة





الراجل – انت عمرو هشام ؟؟



عمرو – ايوه انا



الراجل – اتفضل معانا ( يشاور للي معاه .. فتشوا البيت)



عمرو- على فين ؟ .. وانت مين ؟؟



الراجل – ههههه .. معقول مش عارف ؟؟ .. اللعبة خلصت يا بني انت وهو .. انتوا صدقتوا نفسكوا وللا إيه ؟؟ .. فوق يا عمرو .. كفاية أوي عليكم اللي خدتوه .. ياللا معانا



محمد – بابا .. بابا .. مين دول ؟؟



عمرو – لا مافيش يا محمد .. ما تقلقش .. أنا هاروح معاهم شوية واجي لك ان شاء الله



يلتفت للراجل - وايه لازمة ده كله .. مانتم عارفين مكاني .. ولو طلبتوني بالتليفون هاجيلكم على طول .. لازم الرعب اللي بتعملوه للناس ده ؟



الراجل – بلاش فلسفة يا سي عمرو .. انت مش هتعلمنا شغلنا .. اتفضل ما تضيعش الوقت



محمد – ما تخافش منه يابابا .. ربنا أقوى منه



الراجل ( يصفعه بشده ) – اخرس يابن الـ ...ينزلوا وعمرو معاهم



زوجته – وتضربه ليه ده .. هو يقدر يرد عليك ؟؟ .. ربنا ينتقم منك .. ربنا ينتقم منكم زي ما ضربتوا ابني



واحد منهم ( بينه وبينها) – يا ست الله يخليكي ما تدعيش عليا .. أنا ماليش دعوة .. ده أكل عيشي



عمرو ينادي عليهم – اطمني يا ام محمد .. ربنا معانا .. ومش هيضيعنا





يمشوا .. وتبقى أم محمد تبكي بشدة وهي في ضائقة شديدة .. من غير فلوس .. وابنها عيان جدا .. وجوزها مش عارفة هيرجع امتى .. تقوم وتصلي ركعتين لله تعالى عشان يفرج عنها الكرب اللي هي فيه



تنتهي من صلاتها ..تنظر لابنها .. نام من شدة البكاء .. لسه حرارته مرتفعة .. وشه زي النار



يارب .. يارب .. ماليش غيرك يارب .. اعمل إيه بس ؟؟



تسمع طرقات خفيفة على الباب ..



معقول ؟؟ .. الساعة اتنين بالليل .. مين اللي هييجي دلوقت ؟؟




تقف ورا الباب – مين ؟؟



الزائر – أنا الدكتور



بدهشة شديدة .. ولهفة أشد تفتح الباب – دكتور ؟؟ .. إزاي ؟؟



الدكتور – فين المريض ؟؟





الزوجة تشير على محمد وهي في ذهول .. ومش مصدقة اللي بتشوفه قدام عينيها



يدخل الدكتور .. يكشف على محمد .. ينتهي الكشف




الدكتور – اطمني خالص حضرتك .. هيبقى كويس جدا ان شاء الله .. حضرتك تديله الدوا ده ..والحقن دي .. وعلى الصبح ان شاء الله هيبقى كويس جدا





الزوجة .. في حيرة شديدة .. ومش قادرة ترد




الدكتور – خير ؟؟ .. فيه حاجة ؟؟



الزوجة – أصل والده قابضين عليه في الانتخابات .. ومش سايب لنا فلوس .. ومش هاعرف اجيب الدوا



الدكتور – ايه ؟؟ .. والده قبضوا عليه ؟؟ .. طيب استنيني حضرتك .. أنا هاجيب الدوا وارجع حالا



الزوجة – بس كده كتير على حضرتك يا دكتور .. مش معقول




الدكتور ينزل بسرعة .. يغيب شوية ويرجع معاه الدوا .. والحقن .. يدي محمد الحقنة .. ويستعد للانصراف




الأم (تتمتم بكلمات الشكر) – جزاك الله كل خير يا دكتور .. بس ممكن أسأل حضرتك سؤال واحد بس ؟؟



الدكتور – اتفضلي



الأم – هو مين اللي بعت حضرتك هنا .. عرفت منين ان ابني عيان ؟؟



الدكتور – انتم اللي طلبتوني .. هي مش دي شقة خمسة ؟؟



الأم – لأ .. دي شقة ستة





ذهلت الأم .. أجهشت بالبكاء من الموقف



انصرف الدكتور .. وسجدت الأم شكرا لله على انقاذ ابنها



ياربي لك الحمد .. لك الحمد .. لك الحمد ..





أبو جهل – معقول ده اللي حصل لك ؟؟ .. والدكتور ما رضيش ياخد فلوس ؟؟



عمرو – آه والله ده اللي حصل .. وانا من يومها نسيت اني مسجون .. وحاسس اني مع ربنا طول الوقت .. ومش حامل هم الأولاد أبدا



أبوجهل ( يكتم غيظه وألمه الشديد) – معلش اسمحلي انام شوية ..عن إذنك





في الوقت ده ابليس عمل اتصالاته




إبليس يتكلم في التليفون – أيوه محبوس دلوقت .. بس خلي بالك معاهوش بطاقة ولا أي إثبات شخصية .. خليهم ينادوا عليه ويطلعوه من غير كلام كتير .. مش هيعرف يتفاهم معاهم



- ماشي يا إبليس بيه



تليفون يوصل للقسم – آلو .. عندكم مسجون اسمه عمرو هشام



- أيوه



- المسجون ده تطلعوه حالا .. من غير ما تسألوه عن أوراقه ولا بطاقته



- كده ؟؟ .. من غير أي إثبات شخصية



- زي ما باقولك كده .. تطلعوه حالا





العسكري يوصل للحجز .. ينادي على اللي جوه - عمرو هشام .. انت يا عمرو



عمرو – أيوه انا



العسكري – اتفضل بره من غير مطرود



عمرو – ايه .. بره ؟؟ مين ؟؟ أنا ؟؟



العسكري – بره يا بني ما تجيبليش التهزيئ .. مع السلامة من غير مطرود



ياخد عمرو من إيده لحد باب القسم من بره - مع السلامة





يخرج عمرو .. يتنسم عبير الحرية بعد شهر من الحبس تحت الأرض مع المجرمين والقتلة





يااااااااااااه











وحشتيني يا مصر



باحبك يا مصر










يا ما انت كريم يارب



ألف حمد وشكر ليك يارب



الحمد لله .. الحمد لله










ينطلق عمرو لبيته وأولاده .. وأبو الحكم عمرو بن هشام الشهير بأبي جهل بيغط في نوم عميق .. وإبليس قاعد بره مستنيه في العربية هيتجنن من التأخير وقلقه على مصير أخوه في الكفر .. أبو جهل

الحلقة السادسة

أبو جهل نايم في التخشيبة .. وإبليس بره مش عارف يتصرف .. والوقت بدري جدا مش عارف يكلم حد في التليفون .. وفي نفس الوقت



مش عارف ايه اللي بيحصل أبو جهل يفاجأ بالمساجين اللي حواليه بيصحوه






مسجون – اصحى يا أخ .. اصحى يا جدع انت .. انت جاي تنام هنا ؟؟ .. ما تروح تنام في بيتكو






أبوجهل – عايز ايه .. فيه إيه .. وفين الراجل اللي كان معايا ؟






مسجون – الشيخ عمرو .. لا .. ده ربنا فرجها عليه وطلعوه كده فجأة .. هو انت تبعه برضه .. وللا تبعنا ؟؟






أبو جهل – تبعه ايه وتبعكم ايه .. مش فاهم ؟






المسجون – يعني مانلاقيش معاك حتة مزاج كده نظبـّطوا بيها .. أنا خلاص .. دماغي هتفرقع






أبو جهل – بس كده ؟؟ .. خد يا عم .. بس بالراحة شوية .. آدي حتة بسكوت اهي .. كان معايا باكو امبارح ولسه فاضل



فيه شوية






المسجون – حتة ايه يا اخويا ؟؟ .. بسكوت .. ها آأآأآو .. لا ما يكمـّلش .. انت هتشتغلني ياله ؟






مسجون تاني - – ها ها ها اااااااي .. بسكوت .. بسكوت ايه يا غشيم .. ده شكله كده كده مالوش في الصنف يا معلمة ..
( ياخده على قفاه ) .. حلوة .. حلوة أوي .. هع هع هع






مسجون تالت – ده شكله مش هييجي بالذوق .. احنا نقلبـّوه احسن .. طلع اللي في جيبك ياله






يمد ايده في جيبه .. وواحد تاني في جيب تاني .. وفجأة أبو جهل يلاقي نفسه ملطشة في إيد المساجين ولا حول له ولا قوة .. ولم ينقذه منهم إلا صوت السجان .. بيطلب أبو جهل للتحقيق






السجان – بس يا مسجون انت وهو .. فين عمرو هشام ؟






أبو جهل – أيوه انا .. أنا عمرو .. طلعني من هنا أبوس ايدك






السجان – اتفضل معايا






يطلع أبو جهل .. وفجأة يلاقي نفسه في غرفة التحقيق .. وداخل في حوار مالوش فيه خالص






المحقق – انت عمرو هشام






أبو جهل – أيوه






المحقق – شوف يا عمرو .. احنا سكتنا عليك كتير .. تصلي وتصوم وتعبد ربنا براحتك .. ماحدش هيقول لك لأ .. بس سكة السياسة والانتخابات والكلام الخطر ده مش كويس عشانك .. انت عندك بيت وأولاد واحنا عايزين مصلحتك .. وبعدين ربنا بيقول في القرآن ( ولا تلقوا بأيديكم إلى التهلكة )






أبو جهل – قرآن إيه وصلاة إيه .. أنا مش مؤمن بربكم ده ولا بالقرآن .. ولا باصلي ولا باصوم






المحقق ( يبص له باستغراب شديد ) – ايه اللي بتقوله ده .. يابني احنا مش قصدنا تكفر .. ما تبالغش قوي كده .. معقول الشهر اللي اتحبسته ده يعمل فيك كده






أبو جهل – لا .. أنا طول عمري كده .. ومش باكره في الدنيا دي أد محمد وأصحابه






المحقق ( يضرب كفا بكف ) – ياناس .. يا عالم .. أنا هاتجنن .. ياراجل انت .. مش معقول اللي بتقوله ده .. شوف احنا خلاص هنطلعك .. بس ماتقولش الكلام ده .. ده كلام يودي في داهية






الكاتب ( يميل على المحقق ) – سعادتك أصل اللي بيتعمل فيهم جوه مش شوية .. ده انا مرة شفت واحد اعترف انه هو



اللي اغتال كنيدي .. عشان يخلص من اللي هو فيه






المحقق – شوف يا عمرو .. انت كده ممكن تطلع .. وزي ما قلت لك مالكش دعوة بحد وخليك في حالك .. بس بلاش يابني موضوع ربنا والقرآن ده .. ما تحملنيش ذنبك






أبو جهل – انتم كلكم صابئين .. وانا هافضل احاربكم لغاية ما اموت






المحقق – صابئين .. لااااااااا .. ده انت زودتها أوي



يلتفت للكاتب - طلعوه بره الجدع ده .. طلعوه قبل ما يجنني .. بس حطوه تحت المراقبة .. أما نشوف حكايته دي أصلها إيه .. لو رجع يصلي في الجامع هاتوه على طول






يطلع أبو جهل .. يخرج بره يلاقي إبليس مستنيه وهو في قمة القلق






أبوجهل – كده يا إبليس ؟؟ .. هي دي برضه الأخوة .. معقول تعمل فيا كده .. ده العيال اللي جوه بهدلوني آخر بهدلة






إبليس – ده انا باعت لك من بدري والله .. بس مش عارف إيه اللي أخرك كده .. انت ما جالكش حد يطلعك ؟؟






أبو جهل – لأ .. دول قعدوا يحققوا معايا .. ولما لقوني مش خطر على الأمن طلعوني






إبليس – طب الحمد لله .. تعال نام لك شوية بقى .. تلاقيك تعبان جدا






يروحوا .. أبو جهل يدخل ينام .. يروح في سبات عميق .. يعوض التعب اللي تعبه جوه .. ينام له كده ييجي أسبوع .. عشرة ايام .. لزوم الحبكة .. هههههه النهارده يوم عرفة .. إبليس يصحيه لما يلاقيه طـّول في النوم






ابليس – اصحى يابو جهل .. اصحى



ابو جهل – ايه .. مين ؟؟ .. أنا فين ؟؟



ابليس – انت معايا هنا .. عامل ايه دلوقت .. ان شاء الله تكون ارتحت



أبو جهل – طيب مش هننزل شوية وللا ايه .. انا عايز اشم شوية هوا



ابليس – لأ .. مش النهارده .. النهارده انا لازم استخبى



ابو جهل – تستخبى ليه .. ومن إيه ؟؟



ابليس – أصل النهارده يوم صعب اوي عليا .. النهارده يوم الحج الأكبر



أبو جهل – يعني إيه .. يوم عرفة ؟



إبليس ( بحرقة ) – أيوه .. شوف كل التعب اللي انا تعبته مع الناس دول .. وازاي خليتهم يعملوا كل السيئات اللي ما تخطرش على بال حد .. وبعدين ييجوا النهارده .. ربنا يغفر لهم .. هاتجنن يابو الحكم ياخويا .. هاتجنن



ابو جهل – معقول الكلام ده ؟؟ ازاي ؟؟



أبليس – زي ما باقول لك كده .. المشكلة ان ناس كتير منهم هتلاقيهم النهارده صايمين .. زي ما يكونوا في رمضان .. انا مش عارف ازاي كده .. ما كانوش كده زمان



أبو جهل – طيب تعال نشوف كده .. مش هاصدق غير لما اشوف بعنيا



ابليس – ما بلاش احسن



ابو جهل – لأ .. تعال نشوف



ينزلوا .. فعلا الناس شكلها مختلف .. ابليس بيميز رائحة الصايمين .. ناس كتير جدا صايمة .. وإبليس لونه متغير من ريحة الصايمين .. وباين عليه متكدر جدا .. يدخلوا محل يلاقوه مشغل قرآن .. يدخلوا مطعم ياكلوا .. الناس يبصوا لهم باستغراب .. معقول الناس حصل لها كده






ناس كتير دابحة دبايح وبتوزع اللحم على الفقراء في الشارع .. الفقراء في منتهى السعادة .. وأصحاب الدبايح أسعد منهم .. وأبو جهل يتغاظ جدا من المنظر .. وإبليس يتلوى من الألم .. يعدوا على جامع كبير .. فيه درس بعد العصر .. والإمام بيدعي والناس بتدعي وراه .. بين الخشوع والدموع .. لحظات التوبة .. والمغفرة .. وتنزل الرحمات






إبليس – كفاية كفاية .. مش قادر استحمل .. أعمل ايه اكتر من كده .. معقول كل دول يتغفر لهم في لحظة واحدة كده ؟؟ .. حرام






ابو جهل – تعال نروح .. انا اتخنقت .. مش قادر استحمل






يروحوا البيت .. يناموا من الهم والغم .. يصحى أبو جهل على صوت تكبيرات العيد












الله أكبر الله أكبر الله أكبر



لا إله إلا الله



الله أكبر الله أكبر ولله الحمد



الله أكبر كبيرا



والحمد لله كثيرا



وسبحان الله بكرة وأصيلا



لا إله إلا الله



وحده



صدق وعده



ونصر عبده



وأعز جنده وهزم الأحزاب وحده



لا إله إلا الله



ولا نعبد إلا إياه



مخلصين له الدين ولو كره الكافرون



اللهم صل على سيدنا محمد



وعلى آل سيدنا محمد



وعلى أصحاب سيدنا محمد



وعلى أنصار سيدنا محمد



وعلى أزواج سيدنا محمد



وعلى ذرية سيدنا محمد وسلم تسليما كثيرا






أبو جهل – ايه يا إبليس ده .. جيش المسلمين جه وللا ايه ؟






إبليس ( في انهيار تام .. وصوته طالع بالعافية ) – لأ .. دي صلاة العيد .. أنصحك ما تحاولش تبص من الشباك .. مش هيحصل لك كويس






أبو جهل – النهارده عيد المسلمين ؟؟






إبليس – أيوه .. بيحتفلوا بنفس اليوم اللي أبوهم ابراهيم أطاع فيه ربنا وكان هيدبح ابنه اسماعيل .. ابراهيم اطاع ربنا ولغاية دلوقت الناس بتحتفل بيه .. وانا عصيته ولغاية دلوقت الناس بتلعني .. إهيء إهيء إهيء .. ياويلك يا سواد ليلك يا إبليس .. ايه اللي خلاك تعمل كده ؟؟






أبو جهل – ياراجل ما تقولش كده .. انا اخوك اهه ومعاك الى النهاية .. اجمد خليك راجل .. انا لازم ابص اشوف المنظر ده






يبص ابو جهل من الشباك يترعب .. آلاف المسلمين في ملابس العيد الجميلة .. خرجوا يصلوا العيد في ميدان كبير جنب الفندق .. الزينة جميلة جدا .. والوجوه منورة .. فرحانين بالعيد .. ومستبشرين بالمغفرة والجنة .. والكل بيسلم على بعضه بكل حب .. وابتسامات جميلة على وشهم .. ستات كتير جدا بحجابهم الأبيض في تجمع ضخم .. منظر جميل جدا .. وبدأوا يصلوا العيد .. والكل يكبر ورا الإمام ..






الله أكبر .. الله أكبر



الله أكبر .. الله أكبر






أبو جهل يدخل مذعورا






ابوجهل – ابليس .. رجعني .. رجعني بيتنا بسرعة .. أنا هاموت .. مش قادر استحمل .. الصوت ده بيموتني






إبليس – خلاص يا بو الحكم .. هانت .. استحمل شوية .. ساعة زمن بس






ابو جهل – ساعة زمن ايه .. انا خايف .. الناس دول لو شافوني هيموتوني .. دول شبه أصحاب محمد بالضبط .. معقول المنظر اللي انا شايفه .. وشاطر بس كل شوية تقوللي اخوك عامل شغل .. شغل ايه ؟؟ وصوت التكبير هيخرم وداني






إبليس – سيبني انام شوية بس ولما اصحى هاقولك






ينام ابليس .. وابوجهل .. وصحوا على الظهر كده






ابليس – ابو الحكم .. ابو الحكم .. ياللا ننزل بقى .. عندنا شغل






ابو جهل – شغل ايه ؟؟






ابليس منفعل جدا – ياللا بس تعالى .. هاروقك النهارده تمام






ينزلوا الشارع .. الناس شكلها متغير .. والآلاف اللي كان ابو جهل شايفها الصبح اتبخرت .. والستات اللي كانوا متحجبين الصبح فص ملح وداب .. ومش شايف قدامه غير ولاد وبنات واقفين مع بعض في أوضاع مريبة .. البنات لابسين ملابس فاضحة مثيرة .. يا إما ما فيش ملابس تقريبا .. في تجمع ضخم برضه .. بس قدام سينما .. ويافطة كبيرة مكتوب عليها







حاحه .. و اباحه






أبو جهل – الله الله .. إيه الجمال ده .. طلعوا منين دول يا إبليس .. اسمح لي أسحب كل الكلام اللي قلته .. ده انت استاذ كبير والله .. هم دول مش تبع الجماعة بتوع الصبح برضه .. وللا دول ناس تانية






إبليس ( بلهجة الاستاذ ) – دي يا سيدي اسمها سينما .. الناس بتدخلها تتفرج على حاجة اسمها أفلام .. قصص كده ناس بتمثلها






أبو جهل - طب والناس دول ايه نظامهم ؟






- شوف يا بو جهل يا حبيبي .. الشباب دول انواع .. مش كلهم حاجة واحدة .. منهم اللي ما بيصليش أصلا ومالوش علاقة بالمنظر اللي انت شفته الصبح .. ودول مش شغلتي .. دول مريحيني خالص






ابو جهل – طيب .. ده نوع






إبليس – ونوع تاني .. راحوا يصلوا وكل حاجة .. بس انا مفهمهم دايما حكاية ايه ؟؟؟






أبو جهل – دي نقرة ودي نقرة






ابليس – الله ينور عليك .. دي نقرة ودي نقرة .. يطلعوا من الصلاة يعملوا اللي هم عايزينه .. ساعة الصلاة .. مؤمنين أوي .. وساعة الهلس .. ابوظ منّي






ابو جهل – والله فكرة برضه .. واهو مسيرهم شوية شوية يبطلوا الصلاة






ابليس – قول يا مسهل .. اهو انا زي مانت شايف مش مقصر .. وراهم وراهم .. هيروحوا مني فين .. يعني هادخل النار لوحدي .. عليا وعلى اعدائي






أبو جهل - طب ولا مؤاخذة كده .. يعني ايه الكلام المكتوب عاليافطة ده .. حاحه .. وأباحة






إبليس - ههههههه .. انت واخد بالك .. هيافة بعيد عنك .. تفاهة .. الناس دول دلوقت بيدوروا على أي كلام خايب يضحكوا عليه وضيوعوا فيه وقتهم .. وكل ما كان عنوان الفيلم سخيف وخايب .. كل ما ازداد الإقبال عليه






يمشوا شوية كده .. يفاجئوا بمنظر الدبايح تاني .. والناس بتورزع اللحوم على الفقراء .. والسعادة على وجوه الجميع .. وصوت التكبير .. بس الله الله أكبر .. يفر إبليس وأبو جهل مذعورين .. ويفضل صراع الحق والباطل مستمر

الحلقة السابعة

إبليس اخد أبو جهل في جولة داخل البلد .. وفي طريقهم لقوا مجموعة كبيرة من الشباب والبنات عند محطة القطار .. كل واحد واقف مع واحدة .. وشكلهم كده بيستعدوا للسفر .. وهات يا هزار وضحك .. وزغزغة .. آخر روشنة .






أبو جهل – إيه دول يا إبليس .. مسلمين دول ؟؟


إبليس – آه طبعا مسلمين .. مش باين عليهم وللا إيه ؟


ابو جهل – بصراحة مش عارف .. ما هي بقت حاجة تلخبط .. مش هاخد بالشكل بعد كده


ابليس – دول بقى طالعين رحلة .. هيسافروا مع بعض أسبوع .. أحلى شغل باعمله معاهم في الأسبوع ده .. اتفرج عليهم لما يوصلوا هناك بقى .. وينزلوا جولات سياحية .. وكل واحد يختفي مع واحدة تحت الشجر يا وهيبة .. وانا تالتهم طبعا


أبو جهل – قشطة عليك يا بيسو .. أهي دي ضربة معلم .. بس معقول أهاليهم بيسيبوهم يسافروا مع بعض كده عادي ؟؟ .. ما عندهمش نخوة دول وللا إيه .. ده انا ما كنتش اسيب بنتي تخرج مع حد غريب ابدا .. انا هاروح اتأكد من الكلام ده


إبليس – هتعمل ايه يا مجنون ؟؟


أبو جهل – هاروح اكلمهم .. واكلم أهاليهم .. أشوف فعلا بيعملوا كده وللا لأ ؟؟


إبليس – يابني هتضحك الناس عليك


ابو جهل – ما هو أصله كلام ما يخشش النافوخ .. سيبني يا عم






يروح لولد وبنت واقفين مع بعض .. الولد عمال يزغزغها .. والبنت قاعدة تضحك بصوت عالي






أبو جهل – انت يا أستاذ


الولد – نعم ؟؟ .. انت بتكلمني ؟؟


أبو جهل – أيوه .. ممكن أعرف بتعملوا إيه ؟؟


الولد ( باستهزاء ) – وانت مالك ؟؟


أبو جهل – معلش يابني .. انا غريب مش من هنا .. بس شفت شكلكم كده حبيت اعرف ايه اللي بيحصل


الولد – مافيش .. دي صاحبتي .. وطالعين رحلة كام يوم كده مع الجروب في الكلية


أبو جهل – كام يوم ؟؟ .. يعني معقول البنات دول هيباتوا بره بيوتهم معاكم كام يوم ؟؟


الولد – قصدك ايه يا أستاذ ؟؟ .. احنا شباب محترمين جدا وولاد ناس .. والبنات اللي معانا زي اخواتنا بالضبط .. اوع تفكيرك يروح لبعيد


أبو جهل – لا والله عداكم العيب .. بس انا شايف ان هزاركم مع بعض غريب شوية


البنت – مافيهاش حاجة يا أونكل .. احنا زملا .. ومافيش بيننا غير كل احترام .. فيها ايه لما يزغزغني .. ده حتى توتو روش وكووول أوي


ابو جهل – واسمك توتو ؟؟


الوله – اسمي توفيق .. توتو اسم الدلع


ابو جهل – ربنا يخليك لماما يا توتو .. عيشوا ياولاد .. خدوا راحتكم خالص .. تيك يور تايم


البنت – ميرسي أوي يا عمو






أبو جهل يتجه لأحد الآباء .. جاي يوصل بنته .. وواقف معاها هي وبقية الشلة






أبوجهل – لامؤاخذة حضرتك بنتك طالعة الرحلة ؟؟


الأب – أيوه .. أهلا وسهلا .. حضرتك والد واحدة من اللي معانا ؟؟


أبو جهل – لا والله .. انا بس كنت مستغرب انك سايب بنتك تسافر أسبوع كده مع شباب أغراب كده


الأب – المجرمة ؟؟ .. هي طالعة مع أغراب ؟؟ .. ما قالتليش كده ؟؟


أبو جهل – أمال مين اللي طالعين معاها دول ؟؟


الأب – آآآآآآه .. ياراجل خضيتني .. قصدك توتو والشلة .. دول زمايلها في الكلية .. أنا بنتي ما تخرجش مع حد غريب أبدا .. لكن زمايلها دول زي اخواتها بالضبط


أبو جهل – آه آه .. صح كده .. لا مؤاخذة أنا كنت فاكرهم أغراب


الأب – لا يا أستاذ احنا عيلة محترمة جدا ومش بتوع كلام من ده






أبو جهل يتجه لإبليس ..






ابليس – صدقت بقى .. جبت لنفسك الكلام بس


ابو جهل – معقول اللي بيحصل ده يا إبليس .. ده الراجل واثق أوي من نفسه .. وسايب الواد يزغزغ بنته كده .. وكمان الواد قد الشحط واسمه توتو .. انا كنت عايز اهفه قلمين على وشه .. بس قلت بلاش ابوظ شغلك


ابليس – ههههههه .. تحب تركب معاهم القطر .. اتفرج اول ما القطر يمشي هيحصل ايه


أبو جهل – هيحصل ايه ؟؟


إبليس – استنى وانت تشوف






أبو جهل وإبليس يركبوا معاهم القطر .. أول ما ركبوا كل واحد قعد جنب واحدة .. ما فيش واحد غلط وقعد جنب واحد أبدا .. يمكن عيب ؟؟ الله أعلم






شوية كده وقعدوا يغنوا .. والطبلة والرق طلعوا .. طبلة انما ايه ؟؟ حاجة ترقص القطر نفسه .. بنتين اتحزموا وقعدوا يرقصوا .. والقطر اتقلب مسخرة .. والبنات أصروا يحزموا توتو ونزل يرقص معاهم .. والكل بيغني






الحب نص نص


والكلمة هس هس


قلت لها باحبك انتي


قالت لي حبك برص


برص


برص


برص


وهيييييييييييييييييييييييييييه






ابو جهل – اخص على ده كلام .. فيه حد بيغني لواحدة يقول لها حبك برص .. ايه يا عم ده


ابليس – ده الشعر الحديث .. اللون اللي بيعجب الشباب ويرقص البنات .. شغل اخوك ابليس فروم ايه تو زد


ابو جهل – شعر ؟؟ .. ده شعر ده ؟؟ لاااااااا .. ده انت زودتها أوي .. نزلني يا عم انت .. انا اتخنقت .. نزلني


ابليس – طيب .. طيب .. بس امسك نفسك عشان هنطير






يطير ابليس وابوجهل .. هربا من المسخرة الشديدة اللي في القطر .. وتوتو وعصابة بوبي الحبوب


رجع أبو جهل وإبليس الفندق .. لفت نظر أبوجهل تجمع من الناس بيتفرجوا على التليفزيون في إحدى القاعات .. ابو جهل قال بس .. أكيد فيه فيديو كليب ميه ميه .. نلحق نشوف لنا حتة كده وللا كده .. راح جري يشوف .. لقى الناس بتتفرج على فريق صناع الحياة في ندوة من ندواتهم في الحج .. والحاضرين بيعرضوا مشاريعهم وطموحاتهم للنهضة .. تجمع جميل .. والحماس في عيون الجميع .. وكلمات الاستحسان من بعض الحاضرين






أحد الحجاج بيتكلم في الندوة – وان شاء الله المشروع ده ممكن في خلال سنة واحدة يوجد فرص عمل لخمسة آلاف شاب على الأقل .. وهيخدم مشروع النهضة ويحقق أهدافنا لخدمة الإسلام والمسلمين






حاج آخر – وانا على استعداد لتمويل المشروع .. وايدي في ايدكم وربنا يتقبل مننا جميعا ان شاء الله






الحاضرين في الفندق في منتهى السعادة






احد الحاضرين – ماشاء الله .. حاجة جميلة جدا .. كان نفسي أكون معاهم الجماعة دول




واحد تاني – انا حجيت قبل كده .. بس أول مرة احس بمعنى الحج .. وازاي انه مؤتمر للمسلمين .. ورمز لوحدة الأمة






ابوجهل بيسأل إبليس






أبو جهل – إيه ده يا إبليس .. أنا قلت هاجي ألاقي الناس هنا شغالين رقص وطبل وزمر .. إيه اللي بيتفرجوا عليه ده ؟؟


ابليس ( في خزي شديد ) – ده برنامج صناع الحياة .. مجموعة ناس في منتهى الخطورة .. مسببين لي صداع مستمر .. ودلوقت هم في الحج وعاملين الندوة دي لمناقشة أحوال المسلمين


ابو جهل – في الحج ؟؟ فين يعني ؟؟ في منى ؟؟


إبليس – أيوه


أبو جهل – دعني أرجع إليهم فأمزقهم إربا إربا .. واللات والعزي لا أبقى منهم أحدا


إبليس – ياجدع انت ما تفوق بقى .. دول هناك كلهم مسلمين .. انت فاكر هترجع هناك هتبقى سيد قريش .. خلينا نفكر بالعقل وبلاش التهور بتاعك ده


أبو جهل – يعني انت شايف كده .. طيب هتعمل إيه ؟؟


ابليس – مش هاقدر اعمل حاجة طول ما هم هناك .. انا اخاف اروح لإن ده معاد رمي الجمرات .. كلهم بيروحوا هناك يحدفوني بالطوب .. لو شافوني هيقطعوني حتت .. أنا هاستنى لما يروحوا بلادهم ويبقى لي معاهم كلام


أبو جهل – وهم بيحجوا وللا بيعملوا ندوات


ابليس – ما هي دي المشكلة اللي تاعباني جدا .. الناس زمان كانوا بيروحوا الحج .. زي ما راحوا زي ما جم .. دلوقت بقوا يتقابلوا مع بعض .. ويناقشوا مشاكلهم .. ويساعدوا بعض .. مش ممكن اللي بيحصل ده .. هيهدوا كل اللي بنيته في القرون اللي فاتت .. أنا خايف أوي يا بو الحكم .. خايف أوي


أبو جهل – طيب .. طيب .. ما تزعلش نفسك .. تعال نرتاح شوية .. وبعدين نفكر سوا هنعمل إيه






يرتاحوا شوية .. بعد العصر إبليس جاي له دعوة لحضور ندوة ثقافية .. ياخد أبوجهل ويروحوا .. ناس محترمين أوي .. كله لابس بدل .. و فورمال ميه ميه .. سيدات المجتمع حاضرين .. بعد كلمة الافتتاح يتقدم الضيف الكبير لإلقاء المحاضرة






الضيف – حقيقة الأمر أن انعكاس مؤثرات اللاوعي على أداء الأنا الداخلية يؤثر سلبا على المنظومة المتكررة خارج الحيز المنظور .. وقد أكد هذه النظرية الأديب الكبير زكي هلاوس حين استدعى مفردات الذهن من أعماق التاريخ .. وهذا بلاشك من أروع ابداعات الحضارة الإنسانية






تصفيييييييييييييييييق هيييييييييييه .. يا دين النبيييييييييي .. ايه الحلاوة دي .. قول كمان يا أستاذ .. بتقول درر والله






الأستاذ – شكرا شكرا .. وكما قلنا .. فإن الواقع الحضاري ما هو إلا إفراز لمكنونات غير مستقرة .. وكلما ازداد استقرار هذه المكنونات كلما تطور الواقع الحضاري ليؤثر وبفاعلية في المنظومة الابداعية .. واود أن أؤكد على أمر في غاية الأهمية .. وهو أن اللاوعي بلاشك يلعب دورا رئيسيا في إزالة الفجوة بين الحاضر والمستقبل ..






التصفيق الشديد يقاطع المحاضر أكثر من مرة






ابو جهل – الراجل ده بيقول ايه يا إبليس يا خويا ؟؟ .. انجليزي ده يا مرسي ؟؟






بعض الحاضرين ينظرون شذرا لابو جهل .. ويتأففوا من مقاطعته .. وجهله بثقافة اللاوعي






ابليس – بس يابو الحكم .. بس .. ده استاذ كبير أوي .. بس احسن الناس بيبصوا لك


ابو جهل – ناس ايه يا عم .. اقطع دراعي ان كان حد منهم فاهم حاجة .. والله شكلهم جايين يتمنظروا وياكلوا ويمشوا


ابليس – طب تعال بره .. تعال ما تفضحناش .. ياللا نطلع قبل ما ننضرب






يطلعوا بره






ابليس – ما هو انا ظبطت شوية ناس ولمعتهم عشان يطلعوا يقولوا أي كلام .. والناس تصقف لهم .. وكله يضحك على بعضه .. والاسم مثقفين .. وفي الآخر البلد بقت واخدة صفر ثقافي ..وصفر رياضي .. وتحت الصفر اقتصادي


أبو جهل – أهو كده طمنتني .. ده انا كنت بدأت اخاف على البلد


ابليس – لا اطمن .. اخوك صاحي وشغال






يمشوا في الطريق .. يسترعي انتباه أبو جهل بيت قدامه زحمة .. وحركة كتير وسيارات واقفة تحت منتظرة .. يروح يشوف .. يلاقي عنوان كبير ( دار تحفيظ القرآن ) .. ولد صغير طالع من البيت .. أبو جهل يسأله






أبو جهل – لو سمحت .. ايه الزحمة دي ؟؟ هو فيه إيه جوه ؟؟


الولد – دي دار التحفيظ .. بنيجي هنا نحفظ قرآن


أبو جهل – يعني إيه ؟؟ .. مدرسة يعني ؟؟


الولد – لأ .. بعد المدرسة باجي هنا أنا وأصحابي عشان نحفظ القرآن .. الحمد لله أنا حفظت نص القرآن .. وناوي أختم السنة الجاية


أبو جهل – طيب انت مش بتحب تلعب احسن .. ليه تعقد نفسك كده وتحفظ القرآن وانت صغير


الولد – أنا بالعب برضه .. بس اللعب له وقته والقرآن له وقته .. والقرآن هو اللي هينفعني في الآخرة .. ويحفظني من الشيطان


أبو جهل – الشيطان ؟؟ .. آه صحيح .. هو راح فين ؟؟


الولد – هو مين ؟؟


أبو جهل – لا لأ .. مافيش .. أنا كنت باكلم نفسي .. عن إذنك


الولد – لو حضرتك تعبان .. نوصلك .. بابا مستنيني بالعربية


أبو جهل – لا لأ .. شكرا






يتلفت أبو جهل بحثا عن صديقه اللدود ابليس .. يلاقيه واقع على الأرض نظرا لاقترابه من نطاق القرآن .. مش قادر يمشي .. يتعكز عليه .. ويمشوا سوا يجروا أذيال الخيبة






وتوتة توتة .. إيييييييييييه ؟؟





&&&&&&&&&&&&&&&&&&



بقلم الكاتب/ محمد عبد السلام



**************